Супергидрофоб – ҳар қандай телефонни сув ўтказмас қиладиган технология (Видео)

Супергидрофоб қопламлар саноатда жуда кенг кўламда ишлатилади. Бироқ бундай қопламлар маҳсулотни фақатгина қисқа муддат мобайнида суюқликдан ҳимоя қила олади, бу эса унинг ялпи қўлланилишига тўсқинлик қилади. Яқинда Австралия миллий университети олимлари бошқа аналоглардан мустаҳкам ва арзон бўлган аэрозолли супергидрофоб қопламларни яратишди.

Гидрофоб қоплам ўзининг микроскопик ясси шакллари орқали суюқликни юзадан итаради ва буюм сатҳининг қуруқлигини таъминлайди. Аммо ҳозирча бундай материалларнинг юзаси бошқа предметлар билан алоқага киришганда нисбатан тезроқ зарарлана бошлайди. Бу эса материалнинг самарадорлигини сусайтиради.

Австралиялик олимлар яратган янги материал пластик ва полиметилметакрилат комбинациясидан тайёрланган. Синовлар натижасида ушбу материалнинг айни вақтда мавжуд аналоглардан 60% барқарор эканлигини тасдиқлади. Материал узоқ муддат ўзининг сувга қарши хусусиятларини сақлаб қолишга қодир.

Шунингдек, янги гидрофоб нейтрал суюқликлардан ташқари кислота ва спирт каби кимёвий моддаларга ҳам чидамли. Қопламни суртишдан олдин юзани ультрабинафша нур билан тозалаш талаб этилади. Шундан кейин суртилган қоплам юзага мустаҳкам ўрнашади ва суюқликка қарши хусусиятларини камида саккиз ой мобайнида сақлаб қолади.

“Бу қоплам осмонўпар бинолар ойнасини тозалашдан халос қилади, кўзгу ва ойналарнинг терлашига йўл қўймайди, бундай қопламдан турли стратегик объектларни қуришда ҳам фойдаланши мумкин”, – деб таъкидлайди тадқиқотчилар.

Энг қизиғи, қоплам буткул шаффоф рангда, шунинг учун у билан исталган предмет юзасини қоплаш мумкин. Масалан, бу технология смартфон ва бошқа қурилмаларни сувдан бутунлай муҳофаза қилиши мумкин.