Surface Duo 2 vs Galaxy Z Fold3: қайси бири кучлироқ?

Ўтган йилнинг сентябрь ойида Microsoft компанияси Surface Duo букламафонини тақдим этган эди. Компания ушбу смартфон билан муваффақиятга эриша олмаган. Бунга смартфон ҳеч қайси техник жиҳатлари борасида мақтана олмаслиги сабаб бўлган, бунинг устига унинг нархи жуда ҳам қиммат бўлган.

ЎҚИНГ: 550 долларгача бўлган смартфонлар камераси таққослаб кўрилди

Шу йилнинг 22 сентябрида компания энди Surface Duo 2 қурилмасини тақдим этди. Ушбу букламафоннинг рақобатчиси ўтган ойда тақдим этилган Galaxy Z Fold3 смартфонидир. Келинг, яхшиси иккала қурилмани таққослаб чиқамиз.

Юқорида айтилганидек, Surface Duo'нинг биринчи авлоди муваффақиятсизликка учраган, чунки унда 5G, NFC, симсиз қувватланиш имконияти мавжуд бўлмаган. Қўшимчасига, смартфоннинг камераси ҳамда техник жиҳатлари мақтовга арзигулик бўлмаган.

Дизайн

Аввалги авлоддан фарқли равишда, Surface Duo 2'да букланувчи экран мавжуд эмас. Смартфонда иккита алоҳида дисплей бўлиб, улар букланувчи механизм орқали бирлашади. Бошқача қилиб айтганда, смартфоннинг очилиб-ёпилиши худди китобга ўхшайди.

Surface Duo 2'дан фарқли равишда, Galaxy Z Fold3 кўплаб жозибали дизайн элементлари билан мақтана олади. Шунингдек, у мустаҳкам корпус ҳамда букланувчи механизмга эга. Ташқи кўринишидан Z Fold3 премиум смартфонлиги билиниб туради.

Surface Duo 2'нинг ҳажми ўта энлик бўлгани учун уни чўнтакда олиб юриш бироз ноқулай бўлади. Z Fold3 эса Surface Duo'га қараганда анча ихчамроқ.

Дисплей

Samsung ўз букламафонларини ҳар йили такомиллашган дисплейлар билан жиҳозлайди. Z Fold3'нинг ички асосий дисплейи букланади. Дисплей ўта юпқа бўлган шишадан ишланган, уни эса юпқа пластик қоплам ҳимоялаб туради. Ушбу дисплей Z Fold2'даги дисплейдан 80% га бардошлироқ.

Қурилмада 7.6 дюймли OLED дисплейи бўлиб, у 120Hz экран янгиланиш частотасини қўллаб-қувватлайди. Смартфонда, шунингдек, дисплей остида жойлашган селфи камера мавжуд.

Surface Duo 2 эса иккита 5.8 дюймли OLED дисплейига эга. Агар улар бирлаштирилса дисплей ҳажми 8.3 дюйм бўлади. Экран янгиланиш частотаси 90Hz, аввалги авлод Surface Duo'да ушбу кўрсаткич 60Hz бўлганлиги учун, буни ўсиш дейиш мумкин. Бироқ у бу борада ҳали ҳам Z Fold3'дан ортда.

Иккала смартфон стилусни қўллаб-қувватлайди, Samsung S Pen, Microsoft эса Surface Pen билан ишлайди. Surface Duo 2 қурилмасида ташқи экран мавжуд эмас. Шунинг учун, оддий аммаларни бажариш учун ҳам уни очиш керак бўлади.

Унумдорлик

Иккала смартфон ҳам Snapdragon 888 чипи билан жиҳозланган. Бундан ташқари улар 5G тармоғини қўллаб-қувватлайди. Surface Duo 2 қурилмаси 8ГБ, Z Fold3 эса 12ГБ тезкор хотирага эга. Қурилмаларнинг аккумулятор сиғими ҳам бир хил: Z Fold3'да 4,400 мАс, Surface Duo 2'да 4,449 мАс.

Хулоса

Surface Duo 2 аввалги авлодга қараганда анча такомиллашганини кўриш мумкин. Бироқ бу такомиллашувлар ҳам ҳозирда энг яхши букламафон бўлган Z Fold3 билан рақобатлашиш учун камлик қилади.

ЎҚИНГ: Samsung Galaxy Z Fold3 5G'нинг техник жиҳатлари ҳамда қадоқ таркиби билан танишамиз