Тадбиркорлик ва стартапларни молиялаштиришни ривожлантириш бўйича президент фармони кучга кирди
«Тадбиркорлик ва инновациялар соҳасидаги лойиҳаларни молиялаштириш механизмларини такомиллаштириш бўйича қўшимча чора-тадбирлар тўғрисида"ги президент фармони қабул қилинди.
Фармонга биноан, инвесторлар, айниқса хорижий инвесторларнинг инвестиция ҳиссаларини тезкор ва самарали жалб этиш мақсадида инвестиция ҳамда бошқарув компанияларини ташкил қилиш амалиёти кенгайтирилади.
Фармонда қуйидагилар белгилаб қўйилди:
- инвестиция компанияси бошқарув компанияси томонидан кейинчалик инновацион ва бошқа истиқболли лойиҳаларга киритиш учун малакали инвесторларнинг жалб этилган маблағларини шакллантириш ва жамлаш билан боғлиқ фаолиятни амалга оширувчи тижорат ташкилоти ҳисобланади;
- бошқарув компанияси инвестиция компаниясининг инвестиция ҳиссасини улар ўртасида тузилган шартномага мувофиқ бошқарадиган тижорат ташкилоти ҳисобланади;
- венчур фонди жамланган пул маблағларини фақатгина юқори хавфли венчур лойиҳаларига инвестиция қилиш учун мўлжалланган, бошқарув компанияси бошқарувидаги инвестиция компанияси ҳисобланади;
- миллий валютада ва/ёки Марказий банкнинг ҳисса киритилган кундаги курси бўйича хорижий валютада 500 миллион сўмдан кам бўлмаган миқдордаги инвестиция киритган юридик ва жисмоний шахслар, шу жумладан хорижий шахслар малакали инвесторлар ҳисобланади.
Бошқарув ва инвестиция компаниялари, агар қонун ҳужжатларида бошқа ҳолат назарда тутилган бўлмаса, ҳар қандай ташкилий-ҳуқуқий шаклда тузилиши мумкин.
Фармон билан қуйидагилар белгиланди:
- инвестиция ва бошқарув компанияларининг фаолияти лицензияланмайди;
- бошқарув компанияси ўзининг таъсис ҳужжати ва қонун ҳужжатлари билан белгиланган таркибда ва тартибда ички аудит хизматини ташкил этишга мажбур;
- инвестиция компаниялари, бошқарув компаниялари ва малакали инвесторлар ўртасидаги муносабатлар фақатгина шартлари улар томонидан мустақил равишда белгиланиши, шу жумладан биргаликдаги фаолият жараёнида пайдо бўладиган низоларни ҳал қилиш шакли ва усулларини танлаш эркин бўлган шартнома асосида тартибга солинади;
- инвестиция компаниялари заёмлар, шу жумладан гаров таъминоти билан ёки гаров таъминотисиз фоизсиз заёмлар бериш ҳуқуқига эга;
- инвестиция компанияси ҳар йили ташқи аудит ўтказилишини ташкил этишга мажбур;
- инвестиция ва бошқарув компанияларининг фаолиятини мониторинг қилиш қимматли қоғозлар бозорини тартибга солиш бўйича давлат органи томонидан амалга оширилади.
2022 йил 1 январгача ташкил этилган ҳамда ўз фаолиятини амалга ошираётган инвестиция ва бошқарув компаниялари ўз фаолиятларини белгиланган тартибда давом эттиришлари мумкин.
Шунингдек, юқори технологияли тадбиркорлик лойиҳалари-стартапларни биргаликда молиялаштириш ташкил қилинадиган венчур фондлар 2023 йил 1 январга қадар муддатга ягона ижтимоий тўловдан ташқари, барча тўрдаги солиқлар ва мажбурий тўловлар тўлашдан озод бўлади.
ЎҚИНГ: Ўзбекистонда бепул стартап-акселераторлар ташкил этилиши арафасида
