Тадқиқот: Стив Жобс узоғроқ яшаши мумкин эди

Apple компаниясининг асосчиси Стив Жобс 2011 йилда саратон хасталиги билан оғриб, ҳаётдан кўз юмган. Маълум бўлишича, унга ошқозон ости бези саратони ташхиси қўйилгач, афсонавий тадбиркор жарроҳлик амалиётини рад қилган.

Стив Жобс 2003 йилда бедаво дард хабарини эшитгач, хирургик даволанишлар, дори-дармон ва шифохонада ётишга шошмади. Айфон ихтирочиси умрининг қолган қисмини руҳий ва диний амалларга бағишлаб, жаҳоннинг таниқли шифокорларининг кўриги ва маслаҳатларини рад қилган. Аниқроғи у дарда чалғимасдан, вақтини Apple’га бағишлашни хоҳлар эди.

Орадан шунча йил ўтиб, Стив Жобснинг ўлимини тадқиқ қилган доктор Майкл Хантернинг фикрича, агар Стив ташхис қўйилиши билан даволанганида узоғроқ яшаши мумкин эди. Аммо, бу — тақдир. Гарчи, Стив Жобс дунёни тарк этган бўлса ҳам, ундан инсонлар ҳаётини инновациялар билан бойитаётган жаҳоннинг энг бой компанияси қолди.