Танишинг Acer Swift 7 – дунёдаги энг юпқа ультрабук
Шу йилнинг баҳорида намойиш этилган HP Spectre энди жаҳондаги энг юпқа ноутбук эмас. IFA 2016 кўргазмаси доирасида намойиш этилган 9,98 миллиметр юпқаликдаги Acer Swift 7 ундан ушбу номни тортиб олди. Янги модель 13,3 дюймли, IPS матрицадаги Full HD дисплей ва Gorilla Glass таснифидаги ҳимоя ойнасига эга бўлиб, еттинчи авлод (Kaby Lake, Y-серия) Intel Core i5 процессорида ишлайди. Таъкидлаш керак, Intel’нинг мазкур типдаги процессорлари жуда оз энергия сарфлаши билан ажралиб туради. Ишлаб чиқарувчининг айтишича, автоном ҳолатда ноутбукнинг қуввати 9 соатга етар экан.
Acer Swift 7 бор-йўғи 1,1 кг вазн босади, 8 гигабайтли тезкор хотира ва 256 гигабайтли SSD билан таъминланган. Ноутбук процессорни пассив совитилиши ҳисобига умуман шовқинсиз ишлайди. Ноутбукнинг юпқалигига қарамасдан Acer муҳандислари унга иккита USB-C 3.1 портларини жойлаштиришга муваффақ бўлишган. Ноутбукнинг Европадаги бошланғич нархи 1300 еврони ташкил қилади.
