Танишинг: Apple Clips – квадрат шаклли қисқа лавҳалар олувчи янги илова

  •   DiMaX
  •  981
  •  08.04.2017 11:05

Танишинг: Apple Clips – квадрат шаклли қисқа лавҳалар олувчи янги илова

Apple Clips – нима бу?

Clips – iPhone ва iPad учун ишлаб чиқилган янги илова бўлиб, унинг ёрдамида квадрат шаклидаги қисқа видеолавҳа суратга олиш, унга эффектлар, субтитрлар қўшиш ва ижтимоий тармоқларга юклаш мумкин.

Илова App Store’дан бепул юклаб олинади. У iOS операцион тизими таркибига кирмайди, яъни, чет ишлаб чиқарувчилар иловалари билан бирга тарқатилади.

iMovie’дан фарқи нимада?

Clips соддароқ. iMovie – биринчи навбатда macOS-илова бўлиб, кейинчалик унинг мобиль версиясини ҳам чиқаришган. Шу боис у роликлар яратиш учун «десктопча» мантиғини мерос сифатида олган: аввал суратга туширилган лавҳаларни иловага юклаш керак, уларни ўзаро бирлаштириш, мусиқа ва эффектлар қўшиш лозим, кейин эса видеони рендеринг қилиш мумкин.

iMovie интерфейси

Clips бўлса бирйўла мобиль қурилмалар учун яратилган, шунинг учун унда «смартфонча» мантиқ амал қилади: видеони илованинг биринчи экранидаёқ суратга ола бошлаш мумкин, эффектлар ва субтитрларни эса «йўл-йўлакай» қўшиб кетаверса бўлади.

Clips интерфейси

iMovie аксарият ҳолларда, масалан, саёҳатдан, концертдан, намойиш ёки бошқа бирор тадбирдан кейин барча видеоларни битта катта клипга жамлаш учун қўлланади. Clips ёрдамида эса Apple видеони суратга олиш ва уни оммага тақдим этиш орасидаги вақтни қисқартиришни хоҳлаган. Яъни, бу илова iPhone ва iPad фойдаланувчиларига ўз видеолавҳаларини бир зумдаёқ қайта ишлаб, ижтимоий тармоқларга чиқариш имкониятини тақдим этади.

Clips нима учун керак ўзи?

Янги иловани Apple асосан ижтимоий тармоқларнинг фаол фойдаланувчиларига мўлжаллаб чиқарди – роликларнинг квадрат формати ҳам шунга ишора. Clips бир қарашда гўёки Instagram’даги видеоларни таҳрирловчи функционалга ўхшаб кетади, фақат имкониятлари ва функциялари кўпроқ.

Мазкур дастур биринчи навбатда контент яратувчиларга керак: тез-тез Facebook’ка видео юклайдиганлар, Snapchat’да турли emoji’лар қўшадиганлар, Instagram’да фильтрларни қўллайдиганларга. Бундай аудитория учун Clips – ижтимоий тармоқлардаги ўз публикацияларини ранг-баранг қилишнинг яна бир усулидир.

Facebook, Instagram, Snapchat, «ВКонтакте» иловаларининг ўзларига ўрнатилган видео яратиш жиҳозлари ҳозирча ўз функционаллигига кўра Clips билан беллаша олмайди. Apple’нинг янги иловаси улардан биттагина жиҳати бўйича орқада – унда замонавий ниқоблар йўқ.

Хулласи калом, Clips – бу Facebook, Instagram ва бошқа ижтимоий тармоқлару мессенжерлар учун контент яратишга мўлжалланган Apple иловасидир.

Иловадан қандай фойдаланамиз?

Clips’да расм ёки видео суратга олиш учун ёзиш тугмачасини босиб, ушлаб туриш керак. Тугмачани босиб ушлаб туравермаслик учун, свайп ёрдамида шу мақомида тўхтатиб қўйиш мумкин.

Ёзув дарҳол шу ерда, пастда жойлашган роликни монтаж қилиш тасмасига тушади. Эффектларни йўл-йўлакай камеранинг ўзига нисбатан қўллаш ҳам, суратга олиш тугагач қўшиш ҳам мумкин.

Масалан, худди Prisma’даги каби, видеони нейрон тармоғи орқали қайта ишлаш мумкин:

Ёки Snapchat’даги сингари, мессенжердаги хабар баблини қўшса ҳам бўлади:

«Тарих»дагидек, жойлашувни ҳам қўшса бўлади:

Шунингдек, кўп иловалардаги мавжуд emoji’ларни киритиш мумкин:

«Жонли сарлавҳалар»

Clips’нинг энг илғор жиҳати – «Жонли сарлавҳалар»идир. Илова видеодаги овозни таний олади ва унга «жонли эфирда» субтитрларни қўша билади; яъни, гапиришингиз жараёнидаёқ сўзларингиз синхрон тарзда экранда ёзилиб боради. Яхши жиҳати – Clips рус тилини ҳам қўллаб-қувватлайди.

Агарда илова сўзларингизни нотўғри ёзган бўлса, матнни таҳрирлаш мумкин – бунинг учун роликни ижро этиш жараёнида танаффус (пауза)ни босиш керак.

Мазкур функциянинг ишлаши телефонга ўрнатилган тилга боғлиқ: инглизча интерфейсда Clips фақат инглизча гапларнигина англайди.

Apple нега Clips’ни ишлаб чиқди?

Apple биринчи iPad’ни ишлаб чиқарганида, журналистлардан бири, компания контентдан шунчаки фойдаланувчи гаджет ишлаб чиққанлигини, аммо у контент яратувчи эмаслигини танқид қилган эди. Бунга жавобан ИТ-гигант тез орада ўзининг десктоп дастурлари – iMovie, Pages ва Keynote кабиларни iOS иловаси кўринишида тақдим этди.

Охирги икки йил мобайнида Apple айнан контент яратувчи жиҳозлар ишлаб чиқиш билан шуғулланмоқда: iPhone учун қўшалоқ камера, iPad Pro’да ёзиш учун клавиатура-ғилоф, чизиш учун стилус. Clips ҳам шулар қаторини тўлдирувчи ишланма саналади.

Clips барча ижтимоий тармоқларда «Тарих»лар ишга туширилганлиги ҳақидаги хабарлар тарқалган, компаниялар ва фойдаланувчиларнинг видеоконтент билан қизиқишлари ошган паллада пайдо бўлди. App Store’га у жойланишидан бир кун аввал эса Giphy сервиси шунга ўхшаш жиҳозни тақдим этганди.

Янги трендлардан ортда қолмаслик учун, Apple ўзининг ижтимоий сервисини яратишга уриниб ўтирмади – буям оқилона қарор, зеро, компаниянинг мазкур йўналишдаги аввалги ҳаракатларини муваффақиятли деб бўлмайди. Бунинг ўрнига «Олма» ўзи зўр эплаб келаётган ишга қўл урди – контент яратувчи жиҳозлар ишлаб чиқишга асосий эътиборини қаратди.

Clips ёрдамида Apple фойдаланувчиларнинг ижтимоий ҳаётига кириб боришни, унинг тармоқлардаги публикациялари учун узатиш нуқтаси бўлишни истамоқда.

Эпласа керак, нима дедингиз?