Тақдим этилмаган Redmi Note 6 ва Redmi 6 Plus смартфонларини аллақачон «қисмлаб териб» сотишяпти!
Xiaomi компанияси Redmi Note 6 ва Redmi Note 6 Pro смартфонларини тайёрлаётгани ҳақида илк бор FCC орқали маълумот тарқалганди. Кейинчалик эса бу икки модел яна бир неча мамлакатнинг тегишли ташкилотлари томонидан сертификатланган.
ЎҚИНГ: Redmi Note 6 ҳамда Note 6 Pro «йўлга чиқди»: жиҳат ва нархлари маълум!
Шунингдек, Xiaomi бу йил яна Redmi 6 Plus русумли мобил қурилма чиқариши ҳам унинг режаларидан маълум бўлган. Гарчи ушбу смартфонларнинг ҳали ҳатто тақдимот санаси ҳам аниқ бўлмаса-да, «уддабурон» хитойликлар аллақачон Redmi Note 6 ҳамда Redmi 6 Plus моделларини етказиб бера олишларини айтиб, AliExpress орқали эълон беришган.
Аммо шуниси ҳам борки, сотувчилар бу моделларни бутун ҳолида эмас, балки буюртмага кўра қисмларидан териб тайёрлаб беришларини айтишган. Афтидан, смартфонларни териш билан шуғулланувчи расмий цехнинг айрим ходимлари айёрлик йўлини тутишган. Яъни, улар мобил қурилмаларнинг оригинал қисмларини яширинча олиб чиқиб, ташқарида териб сотишни йўлга қўйишган.
Юқоридаги суратда кўриб турганингиздек, Redmi 6 Plus моделининг LCD-экрани диагоналига 5,99-дюймлик бўлиб, тепа қисмида «ўйиқ» мавжуд. Redmi Note 6 фаблети эса 6,18 дюмлик LCD-дисплейга эга ва унинг юқорисидаги «кемтик» нисбатан кичкинароқ:
Табиийки, юқоридаги тарзда териб сотилган смартфоннинг тўғри ишлашига ҳеч ким кафолат бера олмайди, шу боис таваккал қилишнинг ҳам кераги йўқ. Xiaomi’нинг ҳозиргача савдога чиқарган кўплаб смартфонлари, ҳатто яқинда тақдим этилган «Тезкорлик устаси» – Pocophone F1 ҳам Ўзбекистонда расмий кафолат билан сотилмоқда.
