Тақдимот куни аниқ Mi7'нинг нархи ва барча талқини фош бўлди
Xiaomi Mi MIX 2S смартфони тақдимотидан кейин журналистлар диққат эътибори "хитойлик Олма"нинг бошқа флагманига қаратилди. Шу яқин кунлар ичида тақдимоти бўлиб ўтиши кутилаётган бу смартфон модели компания учун йилнинг ҳал қилувчи флагмани бўлади.
Гап Xiaomi Mi 7 номли илғор ва рақибларидан бирмунча арзон смартфон модели тўғрисида кетмоқда. Кеча интернет тармоғида бўлажак смартфон тўрт хил рангдаги корпусда намоён бўлади. Шу билан бирга, унинг ташқи кўриниши ҳамда тақдимот куни ҳақида ҳам аниқ маълумотларга эга бўлиш имкони туғилди.
Мазкур бренд янгиликларини мунтазам ва аниқ ёритиши билан машҳур бўлган Xiaomitoday нашрининг маълум қилишича, Xiaomi Mi 7 акс этган суратлар ҳақиқий. Манбанинг қайд этишича, харидорлар ушбу мобил алоқа қурилмасини тўрт хил рангда – титан, жигар, кўк ҳамда қора рангдаги корпусларда харид қилишлари мумкин бўлади.
Смартфоннинг титан, жигар, кўк рангдаги корпус талқинларининг орқа панели шишадан тайёрланган бўлса, қора рангдаги корпуснинг орқа панели металлдан ишланган. Қора талқин нисбатан соддароқ бўлиши билан бирга, симсиз қувват олиш технологиясидан ҳам маҳрум қилинганлиги айтилмоқда.
Xiaomi мазкур флагманини ҳам икки талқинда – Mi 7 ҳамда Mi 7 Pro талқинларида ишлаб чиқаради. Бир муддат аввал унинг рақиби бўлган Huawei компанияси ҳам ана шу сиёсатни қўллаган эди. Бундан келиб чиқадики, биринчи талқин одми ва арзонроқ, иккинчи талқин эса бирмунча илғор жиҳатлар билан таъминланади.
Xiaomi Mi 7'даги аҳамиятли технологиялар қаторида фойдаланувчи юзини сканери қилиш технологиясини келтириш мумкин. У кечаси ҳам ўз вазифасини қийналмай бажаради. Шу билан бирга, фойдаланувчиларга экранга жойлаштирилган виртуал сканер технологияси ҳам тақдим қилинади.
Xiaomi Mi 7 телефонининг талқинларидан бири энг кучли ҳисобланган 8 ядроли Snapdragon 845 чипсетига эга бўлади. Бу процессорнинг частота тезлиги 2,8 ГГц, унга Adreno 630 видео картаси ўрнатилган. Шу билан бирга чипдаги X20 LTE модеми алоқа тармоғига сониясига 1,2 Гбит тезлигида уланиш имконини беради.
Xiaomi Mi 7 смартфондаги 4480 мА соат ток сиғимига эга аккумулятор батарея тезкор ҳамда симсиз қувват олиш имкони билан таъминланади. Уни Qi стандарти бўйича симсиз қувватлаш мумкин.
Флагманнинг 5,65 дюймли IPS-экранининг томонлари эса ўзаро 18:9 нисбатда бўлади, унинг тасвир аниқлиги 2160х1080 пикселли.
Ҳозиргача маълум хабарларга қараганда, Xiaomi Mi 7 флагманининг энг арзони савдога 430 АҚШ доллари баҳоси билан чиқарилади. Бу ҳайратланарли нарх. Сабаби, унинг рақиблари бугунги кунда камида 800-900 АҚШ долларидан сотилмоқда.
Суратларда акс этиб турган Xiaomi Mi 7 экранидаги сана барчанинг диққатини тортиб турибди. Унинг флагман тақдим этиладиган кун эканини тахмин қилсак, смартфон 2018 йилнинг 4 июнида тақдим қилинади.
