Tecno Phantom V Fold: расмий тизер сурат ва тарқатилган жонли видео
Букламафонлар бозори йилдан-йилга янги брендлар билан кенгайиб бормоқда ва уларнинг энг сўнггиси Tecno компанияси бўлиши мумкин. Таниқли смартфон ишлаб чиқарувчиси ўзининг Phantom бренди остида илк букламафонини тақдим қилишга тайёрланмоқда.
Tecno компанияси тез орада Phantom V Fold букламафони тақдим қилинишини эълон қилди. Компания улашган тизер суратда (юқоридаги) биз Galaxy Z Fold рақибининг орқа томонида юмалоқ камера ороли ва унинг ичида учта камера сенсорлари борлигини кўришимиз мумкин. Айтиш керакки, бу қурилмадаги 5 та камераларнинг учтаси бўлиб, қолганлари иккита селфи камералар бўлади.
Гарчи букламафон тақдимотига ҳали бир ҳафтача бор бўлса ҳам, Интернетда унинг қўлдаги жонли видеоси аллақачон тарқалиб улгурди.
Видеода Phantom V Fold букламафонининг тўлиқ дизайни билан танишишингиз мумкин. Galaxy Z Fold'дан фарқли ўлароқ, Phantom V Fold ёпилганида унинг ошиқ-мошиғи орасида деярли бўш жой қолмайди, яъни у тўлиқ ёпилади. Шунингдек, эътибор бериб қаралса, ён томондаги смартфонни Ёқиш тугмаси бармоқ изини аниқлаш сканери билан интеграциялашганини сезиш мумкин. Видео охирида эса қурилманинг орқа томонига чизиқли нақшлари эътиборингизни тортади.
Компания расман Phantom V Fold букламафони Dimensity 9000+ билан жиҳозланишини тасдиқлаган. Айтиш керакки, ушбу чипдан яқинда Oppo Find N2 Flip букланадиган смартфонида ҳам фойдаланилган эди.
Tecno Phantom V Fold расман феврал ойи охирида бўлиб ўтадиган MWC тадбирида тақдим қилинади.
ЎҚИНГ: 2023 йил январ ойига кўра энг яхши ишлайдиган смартфонлар ўнталиги
