Telegram юзернеймлари аукциони учун тайёргарлик авжида!

Telegram юзернеймлари аукциони учун тайёргарлик авжида!

Telegram тез орада юзернеймлар аукционини ишга туширади. Мессенжер раҳбари бу ҳақида бир неча ой аввал маълум қилган эди. Энди платформанинг фойдаланувчи номлари бўйича расмий Telegram каналининг хабар беришича, ишлаб чиқариш деярли якунига етган.

Юзернеймлар аукциони ишга туширилиши арафасида Android учун Telegram'нинг навбатдаги бета версияси бир қанча ўзгаришлар билан чиқарилди. Янги версияда битта аккаунт билан бир нечта юзернеймларга эгалик қилиш имконияти пайдо бўлган.

Бунда сиз битта аккаунтга бир нечта фойдаланувчи номларини улашингиз ва улар орасидан фақат биттасини асосий қилиб белгилашингиз мумкин бўлади. Қолган юзернеймлар эса иккинчи даражали бўлиб, улар ҳам профилда, асосий юзернейм остида "шунингдек" ёзувидан кейин кўриниб туради (ёки кўринмайдиган қилса ҳам бўлади).

Ҳозирда ушбу функсия тест жараёнида бўлиб, у ҳали бери тўлиқ ишга туширилмаган. Банд қилиш мумкин бўлган юзернеймлар сони, уларнинг канал ёки гуруҳлар учун амал қилиши ҳақидаги маълумотлар ҳозирча аниқ эмас. Шунингдек, биттадан ортиқ фойдаланувчи номларига эгалик қилиш учун Premium обуна талаб қилинадими-йўқми, буниси ҳам бироз қоронғу. 

Маълум бўлишича, ушбу ўзгариш тез орада ишга туширилиши кутилаётган Telegram юзернеймлари аукциони билан боғлиқ. Айтиш керакки, ушбу аукционда сиз қисқа ҳарфли, жозибали фойдаланувчи номларини TON криптовалютаси билан сотиб олиш имконига эга бўласиз. Бунда сизнинг юзернеймга эгалик ҳуқуқингиз NFT'га ўхшаш блокчейн технологияси билан ҳимояланади ва бир неча кун аввал Telegram ўзининг ана шундай "ақлли контракт"ини оммага чиқарди. Унинг заиф томонини Тошкент вақти билан 25 октабр, соат 19:00 гача топганларга эса 200 доллардан, 50 минг долларгача мукофот пули берилиши ваъда қилинган.

ЎҚИНГ: Telegram юзернеймлари аукционга чиқарилди

Сайт янгиликларидан доимий хабардор бўлиш учун Телеграм каналимизга қўшилинг!