Telegram’да овози ўчириб қўйилган чатларни яшириш йўли ҳам топилди!

  •   DiMaX
  •  2197
  •  27.02.2018 18:54

Telegram’да овози ўчириб қўйилган чатларни яшириш йўли ҳам топилди!

Ушбу мессенжерда унча муҳим бўлмаган гуруҳлар, контактлар ёки каналлардан билдиришнома келмайдиган қилиб – овозини ўчириб қўйиш мумкин. Бунинг учун «Билдиришномаларни ўчириш» («Отключить уведомления») функцияси жорий этилган.

ЎҚИНГ: Telegram’нинг ўнта йирик камчилиги бор, биласизми?

Мессенжерни очганингизда, билдиришнома келмайдиган қилиб қўйилган ўша чатларда янги хабарлар бўлса, уларнинг сони ҳам хира рангда кўриниб туради. Овози ўчириб қўйилган шу диалогларни кўринмайдиган қилиб қўйишнинг ҳам имкони бор. Аммо бу усул Telegram’нинг фақат десктоп версиясидагина амал қилади.

Хуллас, билдиришномалари ўчириб қўйилган чатларни кўздан ҳам яшириб қўйиш учун қуйидагиларни амалга ошириш керак:

  1. Дастурнинг юқори чап бурчагидаги асосий менюсини очамиз.
  2. «Созламалар», яъни «Настройки» бандини танлаймиз.
  3. Компьютерда ҳарф теришни лотинчага ўтказиб (тилини «Английский» қилиб) оламиз.
  4. Клавиатурада «workmode» сўзини терамиз (ёзаётганимиз ҳеч қаерда кўринмайди).
  5. Чиққан ойначада «ОК»ни босиб тасдиқлаймиз.

Шундан сўнг десктоп Telegram дастури ўзи ўчиб, қайтадан очилади. Қарасангиз – ундаги чатлар рўйхатининг энг тепасида «Билдиришномасиз чатларни яшириш», яъни «Скрыть чаты без уведомлений» ёзуви пайдо бўлиб қолади. Ўшани боссангиз бас – ўзингиз билдиришнома келмайдиган қилиб қўйган диалоглар яширилади. Уларни яна кўринадиган қилиш учун эса, бояги ёзувнинг ўрнида пайдо бўлган «Барча чатларни кўрсатиш» – «Показать все чаты» ёзувининг устига чертасиз.

Билдиришномасиз чатларни саралаш функциясини ўчириш ҳам худди уни ёқишдаги каби – созламаларда «workmode» буйруғини териш орқали амалга оширилади.

ЎҚИНГ: Telegram’да нотаниш контактлар пайдо бўляптими? Бартараф этамиз!

Сайтимизнинг энг чиройли расмларини Инстаграмдаги саҳифамизда томоша қилинг!