Telegram’даги узилиш: техник носозликми ёки Дуров ҳийласи?
29 март куни кўпчилигимиз кутилмаган нохуш ҳолатга дуч келдик – аксарият учун асосий мулоқот воситаларидан бирига айланиб қолган Telegram ишламай қолди. Компания раҳбари бунинг сабабини техник носозлик, дея изоҳлади, лекин айрим кузатувчилар бошқача қарашни ҳам илгари суришмоқда.
ЎҚИНГ: Telegram мессенжери кўп давлатларда ишламай қолди
Telegram муаммоси шу соатларда Facebook ва Twitter’да энг кўп муҳокама қилинадиган мавзулардан бирига айланди, жумладан, ўзбек интернет-жамиятида ҳам. Telegram’нинг Twitter’даги расмий аккаунтида хабар қилинишича, бу узилишлар Европа, Яқин Шарқ ва МДҲ мамлакатларини қамраб олган. Бунга мессенжернинг ушбу ҳудудлардаги фаолияти учун масъул бўлган дата-марказларида юзага келган электр узилиши сабаб бўлган.
Кейинроқ Павел Дуров ўзининг Telegram-каналида ёзишича, мессенжернинг ишламай қолишига сабаб – дата-марказда ўтказилган режадаги техник ишлар кутилмаганда Telegram’нинг тўхтаб қолишига олиб келган. Аммо тақсимланган инфратузилма шарофати билан мессенжер айрим мамлакатларда ишлашда давом этаверган. Шунингдек, Дуровнинг хабар қилишича, Telegram жамоаси дата-марказ ишчилари билан бевосита мулоқот ўрнатган ва, келажакда яна шу каби муаммолар бўлмаслиги учун, серверларнинг ишига масъул бўлган жиҳозларни янгилашни режалаштирмоқда.
Фойдаланувчиларнинг кўпчилиги (айниқса, Россия ва МДҲ ҳудудидагилар) бу муаммода Россия Федерацияси Алоқа, ахборот технологиялари ва оммавий коммуникациялар соҳаси назорати бўйича федерал хизмати – Роскомнадзорнинг ҳам қўли борлигини гумон қилишган. Бироқ Роскомнадзор мазкур мессенжернинг фаолиятидаги узилишда ўзининг айби йўқлигини тезда эълон қилган.
ЎҚИНГ: Telegram фаолияти тикланди. Унинг ишламай қолишида Роскомнадзорнинг айби борми?
Роскомнадзор бу билан тўхтаб қолгани йўқ – ўзининг Twitter’даги расмий аккаунтида «айрим хорижий компаниялар»га ўз дата-марказларини Россияга кўчиришларини тавсия этган.
Шу ўринда айрим кузатувчилар битта масалага эътибор қаратишяпти: Дуров – истеъдодли тадбиркор бўлиб, ҳар қандай салбий ахборотдан ҳам ўз компанияси манфаати йўлида фойдалана олади. 29 март куни Telegram энг тренд мавзуга айланиши – мессенжернинг фойдаси, албатта, лекин масаланинг яна бир жиҳати ҳам бор.
Гап шундаки, агарда Telegram блокланса, усиз қанчалик қийин бўлишини фойдаланувчилар ўз бошларидан кечириб, ҳис этиб кўрдилар. Энди айрим таҳлилчилар қуйидаги фикрни илгари суришмоқда: қайсидир мамлакат ушбу мессенжерни блоклашга ҳаракат қилса, Дуров шундай моҳирона PR-кампанияга қўл уриши мумкин. Яъни, компания ўша мамлакатда Telegram фаолиятини вақтинча тўхтатади ва буни техник носозликка тўнкайди. Баҳонада ўша мамлакатдаги фойдаланувчилар бу мессенжерсиз қандай қийналишларини англаб етишади ва унинг блокланишига оммавий тарзда қарши чиқишади. Қалай, зўр режами?
Гарчи бу шунчаки исботланмаган тахмин бўлса ҳам, бизнесда ҳар нарса бўлиши мумкинлигини эслатиб қўймоқчимиз.
ЎҚИНГ: Telegram блокланса ҳам унга компьютердан кирса бўлади!
