Telegram Desktop 1.3 талқинида чиқди – унда кўплаб янги имкониятлардан баҳра олинг!
Гарчи Россияда блокланган, кўп ҳудудларда баъзида муаммолар билан ишлаётган бўлса-да, Telegram жамоаси бу мессенжерни такомиллаштиришда давом этмоқда. Жумладан, яқиндагина унинг «яшил роботчали» қурилмалар учун тақдим этилган клиенти янгиланган эди.
ЎҚИНГ: Telegram’нинг Android-иловаси янгиланди – энди бегона контактлардан қутулиш янада осон!
Энди эса компьютер ва ноутбукларда фойдаланиш учун ишлаб чиқилган Telegram Desktop дастури ҳам барқарор 1.3 талқинига қадар янгиланди. Унда қуйидаги ўзгаришлар жорий этилган:
- Цензурани айланиб ўтиш жиҳозлари яхшиланган.
- Илова прокси орқали янада барқарор ишлайдиган бўлган.
- Telegram Desktop’да энди бир нечта прокси-серверни сақлаб қўйиш ҳамда созламалар орқали уларнинг биридан бошқасига тезкор ўтиш мумкин.
- Энди Telegram орқали қўнғироқларда ҳам проксини қўллаш мумкин.
- Тезкор автоматик алмаштирув энди сиз матн тераётганингиздаёқ ишлайди – уни жўнатганингиздан кейин эмас! Автоматик алмаштирувни эса клавиатурангиздаги «Backspace» тугмачаси ёки «Ctrl/Cmd + Z» тугмачалар комбинацияси орқали бекор қилиш мумкин. Нусхалаб олиб ташланган матнга эса автоматик алмаштирув функцияси таъсир этмайди.
ЎҚИНГ: Telegram Desktop’да ишни тезлаштириш ва қулайлаштириш учун тугмачалар комбинациялари
- Матнни тезкор форматлаш учун энди тезкор тугмачалардан фойдаланиш мумкин.
- Telegram Desktop энди автоматик тарзда MTProto протоколи бўйича янгилана олади.
- Матнда *, _ ва ` каби белгилар орқали Markdown-форматлаш хабарни жўнатиш пайтида қўлланади.
- Дастурнинг очилишидаги бош экранида Telegram сервисидан Фойдаланиш шартларига элтувчи ҳавола қўшилган.
- Қўнғироқларда уланиш сифати чизиқчалар шаклида (худди смартфондаги антенна – уяли алоқа сигналининг сифати каби) акс этиб туради.
- Ботлар профилларида /privacy буйруғига ҳавола акс этиб туради.
- Ёзишмаларда, агарда суҳбатдошингиз постни бирор каналдан улашиб жўнатган бўлса, ёнида Quick Share тугмачаси чиқиб туради.
- Агарда хабарни таҳрирлаш жараёнида матнни буткул ўчириб, «Enter»ни боссангиз, илова сизга хабарни бутунича ўчиришни таклиф қилади.
- Бошқа тузатиш ва яхшилашлар амалга оширилган.
ЎҚИНГ: Telegram’ни код-парол ёрдамида ҳимоя қилишни биласизми?
Telegram Desktop дастурини мессенжернинг расмий сайтидан мана бу ҳавола орқали кўчириб олиб ўрнатишингиз мумкин. Агарда аллақачон компьютер ёки ноутбукингизда бу иловадан фойдаланаётган бўлсангиз, уни янгилаб олинг ва янги имкониятлардан баҳраманд бўлинг!
