Telegram’нинг Android-иловаси янгиланди – энди бегона контактлардан қутулиш янада осон!
Гарчи муаллифининг ватанида блокланган бўлса-да, Telegram мессенжери ҳамон ишламоқда. Бунинг устига, дастурчилар унинг турли янгиланишларида блокни айланиб ўтиш жиҳозларини ҳам қўшиб боришаётир.
ЎҚИНГ: Telegram блокланса ҳам iOS ёки Android-смартфондан унга кириш йўли бор!
Жумладан, Telegram мессенжерининг Android-иловаси 4.8.9 (1260X) stable талқинигача янгиланди. Унда «яшил роботчали» қурилмалар фойдаланувчилари учун қуйидаги янги имкониятлар қўшилган:
- Мессенжерда рўйхатдан ўтиш жараёни янгиланган. Масалан, Буюк Британия ва Европа Иттифоқи мамлакатлари аҳолиси Telegram-аккаунт очиш учун 16 ёшдан кичик бўлмаслиги керак.
- Telegram’да рўйхатдан ўтиш чоғида энди компаниянинг Махфийлик сиёсатининг қўлланишига розилик беришингиз лозим. Унинг матни https://telegram.org/privacy манзилида ҳам берилган.
- Телефонингиздаги «Контактлар» рўйхати билан Telegram’дагиси синхронлашиб, орада чалкашлик келиб чиқаётганмиди? Компания бунинг чорасини топди – энди контактларнинг янгиланишини бекор қилиш ҳамда синхронлашган контактларни ўчириш мумкин! Мазкур функция илованинг «Махфийлик ва хавфсизлик» – «Конфиденциальность и безопасность» созламаларида жойлашган.
ЎҚИНГ: Telegram’да нотаниш контактлар пайдо бўляптими? Бартараф этамиз!
- Агарда сиз «Махфий чат»ларда ҳаволаларни дастлабки кўриш функциясини ёқиб қўйган бўлсангиз, уни ҳам «Махфийлик ва хавфсизлик» созламалари орқали ўчириш имкони бор.
Шунингдек, хабарларга кўра, мазкур мессенжернинг компьютер ва ноутбукларга мўлжаллаб чиқарилган дастури – Telegram Desktop ҳам янгиланиш арафасида. Айни дамда унинг альфа-версиялари янгиланмоқда, ушбу янги имконият ва функциялар барқарор иловага ҳам жорий этилиши билан хабар қиламиз, биздан узоқлашманг.
