Telegram’нинг Android иловасида мавзулар пайдо бўлди

Оммабоп Telegram мессенжерининг Android тизимли қурилмаларга мосланган иловаси 3.17 версиясига фойдаланувчиларнинг мавзуларини қўллаб-қувватлаш функцияси қўшилди. Аввалроқ, Telegram Desktop иловасининг янгиланган версиясига мавзуларни қўллаш функцияси қўшилган эди, деб ёзади iguides.ru сайти.

Мессенжернинг Android иловасида мавзуни ўзгартириш ёки ўзингиз мавзу яратиш учун унинг созламаларидаги «Мавзулар» бўлимига (Settings >> Themes) кирасиз. Сукут бўйича учта мавзудан бирини танлаш имконияти бор: стандарт, кўк ва қора.

Агарда таклиф этилган бу вариантлар сизнинг кўнглингизга ўтиришмаса, у ҳолда ўзингиз мавзу яратишингиз ҳам мумкин; бунинг учун тегишли жиҳозлар илованинг ўзига киритилган.

Шунингдек, янги мавзуларни расмий сайтдан ҳам кўчириб олиб ўрнатсангиз бўлади. Telegram’дан аниқлик киритишларича, улар аудиториясининг 85% га яқин қисмини Android фойдаланувчилари ташкил этади.

iOS тизимли қурилмалар учун Telegram иловасининг янгиланишлари ҳам бир неча ҳафта ичида пайдо бўлиши хабар қилинаётир.