Telegram’нинг iOS-иловаси ҳам янгиланди – ўзгаришлар билан танишинг!
Россияда блокланиши ва бошқа мамлакатларда ҳам турли тўсиқларга дуч келишига қарамасдан, Telegram жамоаси ушбу мессенжерни такомиллаштиришда давом этмоқда. Жумладан, унинг Apple мобил қурилмаларида фойдаланишга мўлжалланган клиенти 4.8.3 талқинида тақдим этилди.
ЎҚИНГ: Путин сўз берди: «Telegram ёпилмайди!»
Айтиш керакки, iOS-девайслар учун ишлаб чиқилган Telegram мессенжеридаги ўзгаришлар унинг куни кеча янгиланган Android-иловасидагига қараганда камроқ. Уларнинг қисқача рўйхати қуйидагича:
- Чатларни энди ўқилган ёки ўқилмаган тарзида белгилаб қўйиш мумкин.
- Аудиохабарларни тинглаш ҳамда видеохабарларни кўришнинг тезлаштирилган режими қўшилган.
- Суҳбатдошингизга бировнинг контактини юбораётиб, қабул қилувчига бу контактнинг қайси телефон рақамлари ёки бошқа маълумотлари етиб боришини ўзингиз танлай оласиз.
- Аллақачон юборилган хабарни таҳрирлаётиб, унинг ичидаги медиафайлларни (сурат, видео...) бошқасига алмаштиришингиз, уларнинг кетма-кетлигини ўзгартиришингиз мумкин.
- Қидирувда кишиларнинг никлари чиқмайдиган қилиб қўйиш мумкин.
Ушбу янги имкониятлардан фойдаланиш учун Telegram иловасини мана бу ҳавола орқали App Store каталогидан юклаб (ёки янгилаб) олишингиз мумкин. Унинг кейинги талқинларида эса янада зўр имкониятлар тақдим этилиши кутилаётир.
