Telegram пулли функциялари (видео)
Telegram мессенжери ўз харажатларини қоплаш учун олти ой олдин ўз реклама платформасини ишга туширган эди ва бугунги кунда кўплаб каналларда мессенжер томонидан қўйилаётган расмий рекламаларни кўриш мумкин. Бир неча кун олдин хизмат ўзининг Premium обунасини ҳам ишга тушираётгани ҳақида хабар тарқалган эди ва май ойининг биринчи кунида Telegram'нинг iOS учун бета версиясида пулли функциялар пайдо бўлди.
Янада кўпроқ реакциялар
Ҳозирда Telegram фойдаланувчилари хабарларга 16 хил анимацияли эможилар билан реакция билдиришлари мумкин ва бу мутлақо бепул. Янги пулли обуна билан эса реакциялар сони янада кўпроқ бўлади.
Тўлиқ экранли эксклюзив стикерлар
Павел Дуров 2020 йилда Telegram'нинг молиявий ҳолати ва келажакдаги режалар ҳақида гапирганида мессенжерни харажатларини қоплаш учун реклама платформасини ишга туширилиши билан биргаликда премиум стикерлар ҳақида айтиб ўтган эди ва эндиликда бу эксклюзив стикерлар Telegram Premium обунаси функсиялари қаторида пайдо бўлди. Ушбу пулли стикерлар оддий стикерлар тўпламида мавжуд бўлмайди ва тўлиқ экранда намойиш этилади.
Пулли функциялар ва мессенжерга келаётган бошқа янги хусусиятлар ҳозирда macOS ва iOS (кейинроқ Android ва Desktop) платформаларида синовдан ўтказилмоқда. Афсуски, Telegram Premium обунаси нархи ҳақида ҳеч қандай маълумот йўқ, шунингдек, юқорида айтиб ўтилган икки функциядан ташқари қўшимчалар бўлиш/бўлмаслиги ҳозирча номаълум.
Бундан олдин Telegram'га янгиликлар лентаси, аватар яратувчи ва канал бошқарувчилари учун фойдали функция қўшилаётгани маълум бўлган эди.
ЎҚИНГ: Telegram 2022 йил биринчи чорагида энг кўп юклаб олинган топ 5 иловалар рўйхатига кирди
