Telegram'дан ҳайитликни қабул қилинг!
Telegram ўзининг навбатдаги янгиланишини чиқарди. Android, iOS, macOS ва Unigram учун мессенжер иловалари 9.6 версияга, Telegram Desktop эса 4.8 версияга янгиланди. Ушбу версия қуйидаги янгиликларни ўз ичига олади.
Папкаларни бошқаларга улашиш
Энди сиз Telegram папкаларингизни ҳаволалар орқали бошқаларга улашиш имконига эгасиз. Бунда сиз папкани улашган фойдаланувчилар уни қабул қилиш билан унинг ичидаги канал ёки гуруҳларга автоматик қўшилишади. Таъкидлаш жоизки, папкаларни улашишда фақат оммавий гуруҳ ёки каналлар ва ўзингиз очган папкалар қўллаб-қувватланади, яъни сиз папка ичида шахсий чатларни ёки Telegram'нинг махсус "Гуруҳлар", "Каналлар" каби папкаларини улаша олмайсиз.
Папкани улашиш учун унинг устига бироз босиб туриш ва очилган менюдан "Улашиш (Share)" тугмасини босишингиз керак (агар папка ичида шахсий чат ёки гуруҳ бўлса, унда бу тугма пайдо бўлмайди ёхуд сиз бу папкани бошқаларга улаша олмайсиз). Папкани улашиш вақтида сиз қайси канал ёки оммавий гуруҳ папка ичида улашилишини белгилай оласиз. Барчаси тайёр бўлгандан сўнг, папкангизни улашиш учун яратилган ҳаволадан нусха олиб уни бошқаларга жўнатишингиз мумкин бўлади. Айтганча, сиз папка ҳаволаси ном беришингиз ҳам мумкин.
Қизиғи шундаки, агар сиз папкага янги чатларни қўшсангиз ва унинг ҳаволасини янгиласангиз папкангизни қабул қилган ва унга қўшилган фойдаланувчилар сиз қўшган янги чатлар таклифини қабул қилишади.
Махсус фон суратлари
Telegram'да аллақачондан ҳар бир чат учун алоҳида рангли фон мавзуларини ўрнатиш имконияти мавжуд эди. Ушбу Telegram янгиланиши эса сизга ҳар бир чат учун алоҳида фон суратларини ўрнатиш имконини беради. Бунинг учун чатнинг ўнг юқори бурчагидаги уч нуқтани босинг ва менюда "Фон суратини ўрнатиш" тугмасини босинг (бу аввалги "Фон ранггини ўрнатиш" тугмаси).
Telegram'нинг бир неча хил рангли фон мавзулари остида сиз "Фон суратини галареядан танлаш" тугмасини кўрасиз. У ердан ўзингизга ёққан суратни танлаб, унинг созламаларини тўғрилаб бўлганингиздан кейин уни чатга ўрнацангиз бу ҳақдаги махсус хабар сизнинг суҳбатдошингизга ҳам боради ва бунда улар ҳам ўзлари томонда сизнинг фон суратингизни ўрнатишлари мумкин бўлади.
Ботларнинг яхшиланган веб-иловалари
Telegram ботлари орқали бизнес эгалари ўзларининг веб-иловаларини яратишлари мумкин. Эндиликда ушбу веб-иловаларни исталган чатда уларнинг ҳаволасини босиш ёки юзернеймини ёзиш орқали ишга тушириш мумкин. Масалан, чатда @durgerkingbot (номдан кейин битта бўш жой қолдиринг) номини ёзинг ёки https://t.me/DurgerKingBot/menu ҳаволасини чатга юбориб уни устига босинг.
Шунингдек, агар веб-иловалар гуруҳларда ишга туширилса улар энди ҳамкорлик ва кўпчилик учун мўлжалланган функцияларни қўллаб-қувватлайди.
Ботлар учун янгиликлар ҳали тугамади: энди ботлар ҳам Fragment орқали сотиб олинган ёхуд коллексия қилса бўладиган юзернеймларни қўллаб-қувватлайди, гарчи унда -bot қўшимчаси бўлмаса ҳам.
Яхшиланган интерфейслар ва бошқа ўзгаришлар
iPhone 14 Pro ёки iPhone 14 Pro Мах смартфони эгалари ушбу янгиланишдан кейин профил суратлари учун янги анимацияни сезишлари мумкин.
Профиллар ёки чат маълумотлари саҳифаси айлантирилганда профил сурати суюқлик эффекти билан динамик оролга кириб кетади.
Хабарни "Онлайн бўлганда юбориш" функциясидан фойдаланиш учун энди бир нечта тугмаларни босиб ўтишингиз шарт эмас. Шунчаки хабарни жўнатиш тугмасини босиб туринг ва янги очилган менюда сиз "Онлайн бўлганда юбориш" хусусиятини кўрасиз.
Авваллари Telegram гуруҳ очишда сиздан камида битта фойдаланувчини гуруҳга қўшиш талаб қилинар эди. Бироқ, энди ортиқ бундай бўлмайди яъни сиз гуруҳларни ҳам худди каналлар каби одам қўшмасдан очишингиз мумкин.
Telegram орқали медиа ёки файллар улашиш менюсини энди янада тезроқ айлантириш мумкин, худди Улашилган Медиа саҳифаларида бўлгани каби.
Олдинги Telegram янгиланишидан кейин кичик гуруҳларда хабарларнинг ўқилганлик вақтини кўрсатиб туришни бошлаган эди. Ушбу янгиланиш билан энди топикларда ҳам хабарларнинг ўқилганлик вақтини кўриш мумкин, албатта, топикда 100 тадан кам одам бўлиши керак.
Афсуски, ушбу янгиланиш ҳеч қандай янги стикер ёки эможилар тўпламини ўз ичига олмайди. Янгиланиш ҳозирда барча учун мавжуд ва тарқатилмоқда.
