Телеграмнинг келажаги қандай? Жорий йилда у ўз криптовалютасига эга улкан бизнес майдонига айланадими?

“2018 йил Телеграм учун ажойиб йил бўлди, бироқ 2019 йил компаниямиз тарихида энг муҳим йил бўлади”, дейди Павел Дуров ишонч билан. Январ ойи давомида телеграмчилар жамоаси TON блокчейнининг ишлайдиган версиясини ва унинг асосидаги маҳсулотларни инвесторларга тақдим қилиши лозим.

Телеграм бу янгилиги билан реклама соҳасида жавлон ураётган IT-монополистларнинг томорқасига бостириб кираётгани маълум бўлиб қолди. Шундай қилиб, қадрдон мессенжеримизда юз берувчи ўзгаришларни иккига бўламиз.

Биринчи ўзгариш Telegram Open Network (TON) блокчейн-платформаси ҳамда Gram криптовалютаси бўлиб, у Telegram Wallet махсус ҳамёнида сақланади. TONнинг барқарор версияси ва ҳамён 2018 йилнинг охирги чорагида ишга тушиши керак эди, аммо инвесторларга юборилган охирги хатда 2019 йил мартига мўлжалланаётгани айтилган.

Иккинчи ўзгариш кўплаб функциялар қўшилиши билан боғлиқ бўлиб, уни телеграмчилар ҳамжамияти анчадан бери  муҳокама қилмоқда. Айрим ўзгаришлар криптовалюта билан боғлиқ эмас, хусусан: Телеграм блокланган вақтда барқарор ишлаши, VoIP қўнғироқлар сифати яхшиланиши, каналларни чатдан ажратиш ёки фойдаланувчини ортиқ қизиқтирмайдиган ёзишмаларини архивлаш имконияти.

Бироқ айнан TON ва Gram Телеграмнинг бизнес ўзагини ташкил этади: токенларнинг олдиндан сотилишидан Телеграм 1,7 млрд доллар жамғарди. TONга ҳаммаси бўлиб 200 нафар инсесторни ишонтиришга муваффақ бўлишди, улар орасида ўша машҳур миллиардер Роман Абрамович ҳам бор. Гап-сўзларга кўра, Силикон водийсининг йирик фондлари ҳам телеграмчиларга пул тикишни режалаштиряпти.

ICO Telegramнинг қўйган шарти эътиборга молик: агар шу йилнинг 31 октябригача блокчейн-платформа ишга туширилмаса, сармоячилар пулини қайтариб олиши мумкин.

TON блокчейн платформасига оид ҳамма янгиликлар @Tgram каналида бериб борилмоқда. Келинг, янги бизнес майдонига оид баъзи янгиликларни санаб ўтамиз.

• TON 90 фоиз тайёр, лойиҳа шу йилнинг дастлабки 2-3 ойида ишга тушади.
• Testnet синов версияси январдаёқ ишга тушиши лозим, сиз бу хабарни ўқиётганингизда, эҳтимол, ишга тушган.
• Платформанинг Mainnet ишчи версияси шу йилнинг мартида жамоатчиликка тақдим этилади.

Дарвоқе, Павел Дуров шу кунларда Швейцарияда давом этаётган Давос иқтисодий форумида инвесторлар олдида чиқиш қилиши мумкин.

IT бизнес соҳасини чуқур билмайдиганлар Телеграм қаердан пул ишлаши ҳақида савол беришларини учратамиз. Ҳурматли ўқувчи, кутинг, Телеграм ўз валютасига эга улкан бозор, нафақат, бозор, бизнес майдонига айланадиган кунлар яқин. Шунда юқоридаги саволларга осонгина жавоб қайтаришимиз мумкин бўлади.

ЎҚИНГ: Telegram’да буюк янгиланиш: қандай янги имкониятлар бор?