ТераТавсиф: Apple Watch Series 7

Hasanboy
445
14.10.2021 15:57

Бугундан янги Apple Watch Series 7 олдиндан буюртмалар бериш бошланди. Эртадан эса уларни дўконлардан сотиб олиш мумкин бўлади. Қурилманинг нархи 399 доллар бўлиб, ушбу нарх эвазига смарт соат катта ҳажмли экран, қирилишларга бардошли корпус ҳамда тезкор қувватланиш имкониятини таклиф этади.

ЎҚИНГ: iPhone 13'нинг техник жиҳатлари ҳамда қадоқ таркиби билан танишамиз

Apple'нинг таъкидлашича, каттароқ дисплей қурилмада матн ёзишни осонлаштиради. Мустаҳкам корпус эса смарт соатни турли қирилишлардан сақлайди. Агар сиз Apple Watch Series 4 ёки ундан олдинги моделлардан фойдалансангиз, янги модель билан уларнинг ўртасида катта фарқ бор. Бироқ Series 5 ёки Series 6 Apple Watch'лар билан таққослаганда, янги моделда катта ўзгаришлар бўлганини айтиш қийин. Шундай бўлса ҳам, қурилма ҳозирда сотиб олиш мумкин бўлган энг яхши Apple смарт соати ҳисобланади.

Дисплей

Apple Watch Series 7 қурилмаси 41 ҳамда 44 миллиметрлик дисплейларга эга. Аввалги Series 4, Series 5 ҳамда Series 6 смарт соатларига нисбатан унинг дисплейи 20% га каттароқ бўлса, Series 3 ҳамда SE моделларникидан 50% га каттароқ.

Қурилманинг дисплей ҳажми ошгани ўз навбатида ундан фойдаланишни осонлаштирган, мисол учун, калькулятор, таймер, секундомер каби иловалар каттароқ экранда яхшироқ бошқарилади. Шунингдек, Apple қурилмага тўлиқ QWERTY клавиатурасини ҳам киритди.

Аввалги моделларда хабарларни бирма-бир ёзишга имкон берадиган Apple Scribble ҳамда text-to-speech функциясиялари бор эди. Буларнинг барчаси ҳали ҳам янги смарт соатда мавжуд, аммо Scribble ёки text-to-speech функциясиларига қараганда экрандаги клавиатурадан фойдаланиш анча осон.

Шунингдек, экран ҳажмининг катталашиши смарт соатдаги матнлар ҳарфини ҳам катталашишига сабаб бўлган. Бу ўз навбатида кўз соҳасида муаммолари бўлган фойдаланувчиларга қулайлик яратади. Агар созланмалардан матн ҳарфлари катталаштирилса, бу барча иловалар учун амал қилади.

Дисплей ёрқинлик даражаси жуда яхши, қуёш нурлари остида ҳам бемалол экрандаги маълумотларни кўриш мумкин.

Янги Apple Watch Series 7'нинг midnight, starlight, яшил, кўк ва қизил рангдаги турлари мавжуд.

Мустаҳкам корпус

Янги смарт соат дисплейининг ҳимоя шишаси 50% қалинлашган. Бу ўз навбатида шишанинг чидамлилик даражасини оширган. Мустаҳкамлик даражаси бўйича еттинчи авлод Apple смарт соати аввалги моделлардан анча яхшироқ.

Қурилмага IP6X чангдан ҳимоя стандартига эга. Шунингдек, унинг қувватланиш тезлиги ҳам ошган. Apple'нинг айтишича, янги смарт соат аввалги Series 6'дан 33% га тезроқ заряд олади. 0% дан 80% гача қувват олиш учун қурилма 45 дақиқа вақт сарфлайди. Аккумулятор автономлик даражаси ҳам жуда яхши, тўлиқ қувват билан смарт соат бир ярим кун ишлаб бера олади.

Нималар ўзгармаган?

Apple Watch Series 7'да бир неча ўзгаришлар бўлган бўлса-да, ундаги аксарият хусусиятларни Series 5 ҳамда Series 6 ҳатто SE сериясида ҳам учратиш мумкин. Барча смарт соатларда юрак уриши тезлигини аниқловчи сенсор ҳамда Fitness+ машқлар дастури мавжуд. Улар Wi-Fi ҳамда уяли алоқа тармоғини қўллаб-қувватлайди.

Series 7 смарт соатида бўлган барча функциялар аввалги Series 6 смарт соатида ҳам бор. Бундан ташқари, иккала смарт соат ҳам бир хил процессор билан жиҳозланган.

Сотиб олиш керакми?

Агар сизда Series 5, Series 6 ёки SE смарт соатлари бўлса, Series 7'ни сотиб олишга ҳожат йўқ. Чунки янги моделда бўлган барча функциялар ушбу смарт соатларда ҳам бор. Агар каттароқ дисплей ёки тезкор қувватланиш имконияти сиз учун муҳим бўлса, Series 7 смарт соатини сотиб олишингиз мумкин.

Шунингдек, сизда Series 4 ҳамда Series 3 каби эски Apple смарт соатлари бўлса, у ҳолда ҳам янги Series 7 смарт соатини сотиб олишингиз мумкин.