ТераТавсиф: Xiaomi Mi Note 10 Lite (6-қисм)

ТераТавсиф: Xiaomi Mi Note 10 Lite (6-қисм)

Xiaomi Mi Note 10 Lite смартфонинг тавсифи ҳам қуйидаги қисм билан ўз ниҳоясига етай деб турибди. Смартфон ҳақида тўлиқ бу ерда ўқинг.

Рақиблар
Mi Note смартфонлари нархи жуда ўзгарувчан. Бу қурилмалар нафақат вақт ўтиши билан ўз нархини ўзгартиради, балки мамлакатлар ўртасидаги нархдаги тафовут ҳам анчагина.
Агар сизга Mi Note 10 Lite нархи атрофидаги Samsung қурилмаси керак бўлса, Galayx A51'га муқобил сифатида қарашингиз мумкин. Ушбу қурилма microSD картаси учун махсус слотга эга. Бироқ А51'нинг чипи Lite'никичалик кучли эмас, аккумулятор автономлиги ҳам Хиаоми моделидан қолади, камера сифати ҳам Mi Note 10 Lite'га ютқазади.

Лекин тахминан 800 минг — 1 млн сўм қўшсангиз, Galaxy A71 сизники бўлади. Бу моделнинг унумдорлиги Xiaomi смартфониникига мос келади.

Агарда айнан Lite'нинг нархи атрофидаги смартфон қидираётган бўлсангиз, лекин сиз олмоқчи бўлган қурилманинг камера тизими яхшироқ бўлиши керак бўлса, realme 6 Pro'ни ўйлаб кўришингизни тавсия қиламиз. Бу девайсда телефото камера бор, Lite'да эса йўқ. Селфи камералари ҳам иккита. Лекин эътибор бериш керак бўлган бир жиҳат экрандир. 6 Pro'га LCD экран қўйилган. Янгиланиш частотаси 90Hz бўлса ҳам, бу дисплей барибир LCD'лигича қолади ва Mi Note 10 Lite'нинг OLED панели билан беллаша олмайди.

Сиз жойлашган ҳудудда Sony смартфонларини топиш мумкин бўлса (ҳозирча, Ўзбекистонда эмас) Xperia 10 II'га нима дейсиз? Sony сизга ҳақиқий соф Андроид амалиётини ҳамда IP65/68 чанг ва сувдан ҳимоясини таклиф қилади. Лекин Xiaomi'нинг аккумулятори Sony'никидан кўра кўпроққа етади.

Шу йили тақдим қилинган Motorola One Fusion+ ҳам гўёки Mi Note 10 Lite'га қарши рақиб қилиб чиқарилгандек. Бу қурилмани Ўзбекистондан расман харид қила олмайсиз, лекин ҳозир сиз яшаётган ҳудудда Моторола расмий дилерга эга бўлса, демак, сиздаги танловлар сони яна биттага кўп экан. Бу модель microSD карта уясига эга. Селфи камераси эса корпусдан сизиб чиқади (поп-ап). Корпус ичида эса 5,000 мАс аккумулятор ва Snapdragon 730 процессори жойланган. Ваҳоланки, Motorola сизга таклиф қилаётган ушбу моделга ҳам LCD экран қўйилган.

Якуний хулоса
Оддий қилиб айтганда, Xiaomi Mi Note 10 Lite смартфони Xiaomi Mi Note 10 смартфонининг зўр камера тизимидан маҳрум қилинган кўринишидир. Бошқа томондан икки қурилма бир томчи сувдек гўё. Ҳар икки модель аъло даражадаги дисплей, қуввати узоқ муддатга етувчи аккумулятор ва функцияларга бой интерфейсга эга.

Notebookcheck.net сайти Mi Note 10 Lite ҳақида қуйидагича хулосани ёзади:
«Xiaomi Mi Note 10 Lite юқори тоифага мансуб «ака»си Mi Note 10 билан деярли бир хил даражада кучли ва бир хил техник жиҳатларга эгалиги боис қурилма номидаги «Lite» сўзи фойдаланувчига смартфон ҳақида маълумот беришдан кўра кўпроқ чалғитади. Xiaomi фақатгина камера модулига ўзгартиришлар киритган, бироқ 108МП ўрнига қўйилган 64МП камера ҳам мақтовга лойиқ. Mi Note 10 Lite анчайин арзон; бу борада «Lite» жумласи смартфонга мос келади».

Афзалликлари:
> Катта ва ёруғ AMOLED экран, HDR10;
> Аъло даражадаги аккумулятор автономлиги, тезкор қувватлаш;
> Яхши ёруғликда сифатли тасвирлар, аъло даражадаги видео стабилизацияси;
> Фойдаланишга қулай MIUI интерфейси;
> Апдейтларнинг тез-тез келиши;
> 3.5 мм аудио жек, FM радио, инфрақизил бластер.

Камчиликлари:
> Телефото камера мавжуд эмас;
> Паст ёруғликда камера сифати кўнгилдагидек эмас, селфилар сифати аъло даражада эмас;
> microSD карта слоти йўқ.

Нархи
2020 йил август ойи охири ҳолатига кўра, Ўзбекистондаги баъзи онлайн дўконларда қурилма нархи қуйидагича:
•Asaxiy.uz: 3 150 000 сўм;
•Radius.uz: 3 380 000 сўм;
•Mediapark.uz: 3 485 000 сўм.

Халқаро савдо дўконларидаги нархлари эса қуйидагича:
•Amazon.com 6/64GB: 299,99 АҚШ доллари;
•Amazon.com 6/128GB: 329,99 АҚШ доллари;
•Amazon.com 8/128GB: 349,99 АҚШ доллари.

ЎҚИНГ: ТераТавсиф: Xiaomi Redmi Note 9 Pro (6-қисм)

Сайт янгиликларидан доимий хабардор бўлиш учун Телеграм каналимизга қўшилинг!