«Тешик» экранли яна бир смартфон – Lenovo Z5s тақдимот ҳам санаси айтилди: хўш, ким биринчи экан?
Samsung ўзининг Galaxy A8s моделида олд камера учун экранда «тирқиш» очаётганини эълон қилганди. Аммо «тирқиш»ли дисплейга эга илк смартфонни тақдим этаётганини биринчи бўлиб Huawei расман эълон қилган, тағин бошқалардан «бир қадам олдинда» эканини айтиб мақтанган ҳам эди. Шундай бўлса-да, жанубий кореялик компания «отни қамчилаб» қолди...
ЎҚИНГ: Ниҳоят, Samsung ҳам экрани «тирқиш»ли Galaxy A8s’ни тақдим этяпти – Huawei’га йўл бўлсин!
Бу иккаласидан ташқари, Lenovo’нинг ҳам «тешик» экранли смартфони «жонли» сурати билан фош этилган, кейинроқ эса унинг «жонли» видео ва расми эълон қилинган эди. Бугун Gizchina нашри ушбу антиқа смартфоннинг тақдимот санаси кўрсатилган расмий постерини эълон қилди:
Демак, дисплейи «тирқиш»ли, асосий камераси уч модулли Lenovo Z5s смартфони нафақат Huawei Nova 4 моделидан, балки ҳатто Samsung Galaxy A8s девайсидан ҳам аввал – 6 декабрда тақдим этилар экан!
ЎҚИНГ: Mi Mix 3 ва Honor Magic 2’га ўхшаш, лекин атиги 288 долларлик Lenovo Z5 Pro рекорд ўрнатди!
Умуман олганда, кейинги пайтларда Lenovo компанияси маркетингни кучайтириш эвазига маҳсулотларининг яхши сотилишига эришиб келаётир. Айни мана шу смартфонининг тақдимот санаси борасида ҳам у аввал рақибларини кузатган бўлиши эҳтимоли катта. Яъни, дастлаб хитойлик, кейин жанубий кореялик техногигант ўзларининг «тешик» экранли смартфонларини қачон намойиш этишларини айтишди. Уларнинг тақдимот саналари маълум бўлганидан кейингина Lenovo ўзининг шундай моделининг тақдимот санасини уларникидан олдинга белгилаган.
Lenovo Z5s, Nova 4 ва Galaxy A8s моделларининг Ўзбекистон бозорига расман етиб келишини кутмасак ҳам бўлаверади – улар «Осмон ости салтанати»га мўлжалланган. Лекин Terashop.uz интернет-дўконимиздан Samsung компаниясининг айрим смартфонларини 899 000 сўмдан бошланувчи нархларда сотиб олиш, Huawei’нинг бир қатор «ақлли» телефонларини 890 000 сўмдан бошланган баҳоларда харид қилиш мумкин. Булардан ташқари, энг харидоргир брендлардан бўлмиш «хитойча Apple» телефонлари ҳам савдога қўйилган.
