Tesla Model 3 ҳимоясини бузган хакерларга электромобиль ҳадя этилди!
Ахборот хавфсизлигига бағишланган CanSecWest конференцияси доирасида куни кеча Pwn2Own танлови ҳам бўлиб ўтди. Fluoroacetate хакерлик гуруҳи аъзолари – Ричард Чжу ҳамда Амат Кэм ушбу мусобақада Tesla Model 3 электромобилининг компьютер тизими ҳимоясини бузиб кира олишди.
ЎҚИНГ: Хакер овлаган хакер ҳақида ҳикоя
Чжу ва Кэм автомобилнинг браузери ҳимоясидаги «туйнук»ни топишди ва ундан фойдаланиб, бир неча дақиқа ичидаёқ мультимедиа тизими устидан тўлиқ назоратни қўлга олишди. Бу эса уларга дисплейни блоклаш ҳамда унга турли матнларни чиқариш имконини берди. Tesla вакиллари хакерларга миннатдорчилик билдириб, улар топган нуқсон бартараф этилишини маълум қилишди.
Tesla’нинг миннатдорчилиги ҳам чаккимас: хакерлар нақ 375 минг АҚШ доллари миқдоридаги нақд пулдан ташқари, яна 35 минг доллардан ошиқ турадиган Tesla Model 3 элетромобили ҳам олишди!
Таъкидлаш керакки, Tesla компанияси 2014 йилдан буён Pwn2Own билан ҳамкорлик қилади, аммо у хакерларга қўшимча соврин тариқасида илк бор автомобиль берди.
