Tesla, SpaceX, ана энди Twitter ҳам!
Бугунги куннинг энг бой одами бўлган Илон Маск Twitter кенгашига ижтимоий тармоқни тўлиқ сотиб олиш учун ўзининг "энг зўр ва охирги" таклифини маълум қилди, дея хабар қилмоқда Bloomberg нашри. Миллиардер компаниянинг ҳар бир улуши учун $54.20 (жами 43 миллиард доллар) бермоқчи ва унинг сўзларига кўра, ижтимоий тармоқ компанияси хусусийлаштирилиши керак:
"Мен Twitter'га сармоя киритдим, чунки унинг бутун дунё бўйлаб сўз эркинлиги платформаси бўлиш потенциалига ва сўз эркинлиги амалдаги демократия учун ижтимоий зарурат эканлигига ишонаман.
Бироқ, сармоя киритганимдан бери мен компаниянинг ҳозирги кўринишида на гуллаб-яшнашига, на ижтимоий императивга хизмат қилишига ишонаман. Twitter хусусий компания сифатида ўзгариши керак.
Натижада, мен Twitter'нинг 100% улушини 54,20 доллардан нақд пулга сотиб олишни таклиф қиламан. Бу менинг энг яхши ва якуний таклифим бўлиб, агар у қабул қилинмаса, мен акциядор сифатидаги позициямни қайта кўриб чиқишим керак.
Twitter ажойиб салоҳиятга эга. Мен уни қулфдан чиқараман." дейди Илон Маск ўзининг Twitter кенгашига йўллаган хабарида.
Bloomberg нашрига кўра, Маск'нинг бугунги кундаги бойлиги $260 миллиардни ташкил қилади ва у ҳозирда Tesla, SpaceX, The Boring Company ва Neuralink компанияларига раҳбарлик қилади. Унинг Twitter'ни сотиб олиши таклифидан кейин ижтимоий тармоқ компанияси акциялари 18% га ошиб кетган.
Илон Маск апрел ойининг бошида Twitter'нинг салкам 10% улушини деярли 3 миллиард долларга сотиб олиб ижтимоий тармоқ компаниясининг энг катта акциядорига айланган эди. Шундан кейин миллиардерга Twitter директорлар кенгашига қўшилиш таклиф қилинди, лекин сўнгги сонияларда Илон Маск бу таклифни рад қилди.
ЎҚИНГ: Илон Маск Twitter'га ўзгартириш киритишни бошлаб юборди!
