Tesla’нинг собиқ вице-президенти Apple’га ишга ўтди
Apple корпорацияси Tesla компаниясининг вице-президенти лавозимида ишлаган Стив МакМанусни ишга олди. Илон Маскнинг компаниясида у 2015 йилдан бери ишлаб келган ва автомобилларнинг салони ҳамда кузовини яратишга масъул бўлган.
ЎҚИНГ: Путин билан кўришган роботни Tesla автопилоти уриб «ўлдирди» (+видео)
Bloomberg нашрининг ёзишича, Стив МакМанус Tesla’га ишга келгунига қадар Jaguar Land Rover, Bentley Motors ва Aston Martin компанияларида ҳам юқори лавозимларда ишлаган.
Мутахассислар ижтимоий тармоғи – LinkedIn’даги профилига қараганда, МакМанус купертинолик корпорацияда катта директор лавозимида иш бошлаган. Бироқ унинг айнан нима билан шуғулланиши хабар қилинмаган.
ЎҚИНГ: Россиялик мактаб ўқувчилари Tesla ҳимоясини бузиб, ядро ҳужумини тўхтатиб қолишди!
Apple компанияси ўзининг электрокари устида ишлаётгани ҳақида анчадан бери миш-мишлар юради, бироқ бирор машинанинг якуний концепцияси ҳануз тақдим этилмаган. Стив МакМанус эса айнан автомобиллар интерьерини лойиҳалаштириш борасида тажрибага эга. Шундай бўлса-да, у купертиноликларнинг бошқа лойиҳалари устида ишлашга ҳам бош қўшади, деб ёзади Bloomberg.
Таниқли таҳлилчи Мин-Чи Куо ўтган йили, Apple ўз автомобилини 2023-2025 йилларда тақдим этишини айтганди. Эҳтимол, Стив МакМанус чиндан ҳам шу лойиҳани амалга оширишга жалб этилгандир.
