Техник жиҳатлари расман тасдиқланган Galaxy Note 10'дан фойдаланишаётганда "қўлга тушди"!

Техник жиҳатлари расман тасдиқланган Galaxy Note 10'дан фойдаланишаётганда

Galaxy Note 10'нинг тақдимот санаси яқинлашиб борар экан смартфон билан янада яқиндан танишиб боряпмиз. Samsung ҳам флагманнинг техник жиҳатлари ҳақида куни кеча расмий маълумот берди. Бу маълумотлар миш-мишларнинг кўпи тўғри эканлигини тасдиқлайди.

Сарлавҳада Note 10'дан фойдаланишаётганда смартфон "қўлга туш"иб қолгани ҳақида ёздик. Келинг, шундан бошласак. TME.net ва Slashleaks сайтларининг маълумот беришича, YouTube видео ҳостингида Samsung'нинг флагманидан метрода фойдаланаётган тестер (смартфондан синов учун фойдаланувчи шахс)нинг видеоси пайдо бўлди. Видеодаги "жонли" смартфон дизайни ҳам инсайдерлар маълум қилган расмдаги билан бир хил.

33 сонияли видео лавҳада кўришимиз мумкинки, девайс қўлда анча катта кўринади. Бунга унинг 6.8 дюймли экрани сабабдир. 

Galaxy S10 линейкасидаги смартфонларда камера тирқиши олд панель юқори қисмининг ўнг томонида жойлаштирилган эди. Note 10'да эса, рендер расмларда ҳам тасвирланганидек, ўртага кўчирилган. Видеодан яна кўриш мумкинки, экранда қора фонли ойна очилганда, камера борлиги умуман билинмайди. Фақат оқ фонли экрандагина уни кўриш мумкин. 

Samsung'дагилар Galaxy Note 10'да Супертез қувватлаш технологияси бўлишини тасдиқлади.

Техник жиҳатларига келсак, Samsung 10 август куни Нью-йоркдаги Samsung 837 дўконида илк маротаба мижозлар учун Galaxy Note 10 First Look ("Galaxy Note 10'га илк назар") кўргазмасини ўтказмоқда. Воқеанинг TechRadar сайти томонидан аниқланган рекламасида бир қатор жиҳатлар компания томонидан санаб ўтилган. Видео роликда, хусусан, қуйидагилар айтилади: "Интиқлик билан кутилган янги жиҳатларнинг барчаси билан смартфонни ишлатиб кўриб танишишда биринчилардан бўлинг. Булар қаторига Ақлли аккумулятор, Супертез қувватлаш, Симсиз қувват улашиш, кейинги авлод S Pen'и ва бошқалар киради".

Очиғи, Note 10'га Симсиз қувват улашиш технологиясини "янги" ва "узоқ кутилган", деб номлаш бироз ғалати, бизнингча. Сабаби, бу технология аллақачон S10'да дебют қилиб бўлинган. Бироқ Супертез қувватлаш функцияси кишини бироз ўйлантиради. Яъни буни икки хил тушуниш мумкин: Note 10/Note 10+ лар худди S10 5G каби 25 ваттда қувватланадими ёки кейинги даражали 45 ваттга ўтадими? Мана шуниси аниқ таъкидланмаган. 

Бироқ ҳозирда мавжуд миш-мишларга кўра, компания смартфон билан 25 ваттли қувватлагич тақдим қилади. Лекин Ноте 10 45 ваттли зарядлашни ҳам қўллаб-қувватлаши мумкин, бу дегани 45 ваттли адаптер билан смартфонни янада тезроқ зарядлаш имкони мавжуд бўлади, демакдир. Фақат бундай адаптерни қўшимча равишда сотиб олишингизга тўғри келади.

Samsung Ақлли аккумулятор ҳақида S10'да ҳам маълумот берганди. Ушбу флагмандаги Мослашувчан қувват тежаш режими "смартфондан қандай ва қачон фойдаланиш"ингизга мослашиб, аккумлятор қувватини тежайди. 

Кейинги авлод S Pen'и

Note 10'нинг энг қизиқ томони ундаги кейинги авлод S Pen'идир. Лекин, афсуски, расмий маълумотларда ручканинг стили борасида жуда кам маълумот берилган. Шундай бўлсада, инсайдерларнинг смартфон патентига асосланиб қилаётган тахминларича, унга камера ўрнатилган бўлиши мумкин. S Pen имо-ишораларни ҳам қўллаб-қувватлаши айтилмоқда. Демак, эндиликда экранга қўл текизмасдан ҳам кўплаб жараёнларни амалга ошириш мумкин бўлади. Бундан ташқари, ручкадан фойдаланилаётганда овозли эффектлар ҳам бўлиши мумкин.

Бошқа миш-мишларга кўра, Note 10'да аудио жек ва microSD карта уяси бўлмайди.

Мана шундай шов-шувли хабарларга сабаб бўлаётган смартфон 7 август куни илк бора намойиш қилинади ва яна тахминларга кўра, 23 августдан сотувда пайдо бўлади. Корейсларнинг янги флагмани ҳақидаги энг сўнгги янгиликлардан хабардор бўлиш учун сайтимизни кузатишда давом этинг.

ЎҚИНГ: Қарши олинг: шов-шувли Samsung Galaxy A80 смартфони (+расм ва видео)!