Технологик жиҳатдан тараққий этган 10 давлат

Замонавий илғор технологиялар тобора инсонлар ҳаётига чуқурроқ кириб бормоқда. Ер юзининг кўплаб мамлакатлари ундан фуқаролари ҳаётини яхшилаш, турмуш даражасини ошириш мақсадида фойдаланишади. Давлатнинг технологик жиҳатдан тараққий этганлиги унинг иқтисодий ва сиёсий барқарорлигига чамбарчас боғлиқдир. Қуйида жаҳондаги технологик тараққий этган ўн етакчи мамлакатга қисқача шарҳ берамиз.

1. Япония

2015 йил ҳолати бўйича баҳо берсак, кунчиқар мамлакатни энг технологик ривожланган давлат сифатида эътироф этишга ҳақлимиз. Автомобилсозлик, робот техникаси, электрон техника, металлургия, сейсмик барқарор иншоотлар қурилиши каби соҳаларнинг барчасига юқори технологиялар чуқур кириб борган. Бу ўринда японларнинг таълими ва фанига урғу бериш жоиз.

2. АҚШ

Биринчи бўлиб Ойга одам чиқарган, биринчи атом бомбасини яратган ва яна дунёга бир қанча кашфиётлар тақдим қилган давлат иккинчи ўринда. Технологик жиҳатдан энг яхши таъминланган армияга эга. Фазони ўзлаштириш соҳасида етакчи. Фармацевтика ва телекоммуникация соҳаларида илғордир.

3. Жанубий Корея

LG, Samsung ва Hundai сингари брендлар ватани. Нанотехнологиялар ва роботсозлик соҳаларига жанубий кореялик олимлар қўшган улкан ҳиссани таъкидламай иложи йўқ. Корея Республикасининг фан ва технология вазирлиги замонавий илғор технологияларга оид кўплаб миллий дастурларни молиялаштиради. Биргина факт: Жанубий Кореядаги ўртача интернет тезлиги АҚШдагидан уч баробар ортиқ.

4. Исроил

Фазовий технологиялар бўйича етакчи беш давлатдан бири. Яҳудийлар давлатида экспортдан келган даромаднинг 35 фоизи технологик соҳага сарфланади. Қолаверса, Исроилда электромобилларни зарядловчи йирик инфратузилмавий тармоқ мавжуд бўлиб, бу фуқароларга катта енгиллик яратган.

5. Германия

Mercedes-Benz, Audi, BMW ва Volkswagen ватани. Машинасозлик бўйича хай-тек уяси. Немис олимлари космонавтика ва нанотехнологиялар бўйича ҳам фаол шуғулланяпти. “Макс Планк жамияти” ва “Готфрид Вильгельм Лейбниц” каби илмий-тадқиқот муассасалари номи дунёга танилган.

6. Канада

Саноат соҳасидаги мураккаб тадқиқотлар, биотехнологиялар, фазони ўзлаштиришда фаоллик, буларнинг барчаси Канадага хос. Канада ҳукумати технологик секторни ривожлантиришга маблағни аямайди: ЯИМнинг 1,8 фоизи илмий-тадқиқотлар ва тажриба-конструкторлик ишларига сарфланади.

7. Буюк Британия

Қачонлардир паровоз, реактив ва электр двигатель, чўғланма лампочка каби ихтироларни дунёга берган Британия технологик тараққий этган мамлакатлар ўнлигига киришга тўла ҳақлидир. Авиация, автомобилсозлик, фармацевтика каби соҳаларда инглиз оролчаси етакчилар сафида.

8. Хитой

Хитой деганда Тайванни ҳам тушунамиз. Хитой шиддат билан ривожланяпти, шу билан бирга таниқли бренд ва технологияларни сотиб олмоқда. Келинг, санаб кўрайлик: Volvo, Great Wall, Lenovo, Huawei, Acer, Asus, BBK, BenQ, D-link, Gigabyte, HTC ва яна бир қанча.

9. Финляндия

Замонавий жиҳозларга эга соғлиқни сақлаш тизими жаҳонда энг яхшиларидан деб тан олинган. Донғи кетган Nokia брендининг ватани мобиль коммуникация соҳасида ҳам илғордир. Охирги йилларда ҳукумат томонидан биология, биоэнергетика ва экология соҳалари ривожига урғу берилмоқда.

10. Сингапур

Кичик шаҳар-давлат жаҳоннинг бизнес юритиш учун энг қулай шарт-шароитларга эга мамлакати ҳисобланади. Камбағал ва кичик давлат илғор технологиялари инфратузилмага эга жамият қура олишига Сингапур яққол мисолдир. Бугунга келиб Сингапур жаҳондаги энг тезкор интернет тизими, қулай ва шинам жамоат транспорти ва ҳар бир фуқаро камида битта смартфонга эгалиги билан ғурурлана олади.