Тез кунда iPhone эгалари кўпроқ реклама кўришни бошлайдилар
Гарчи Apple'нинг фалон минг долларлик iPhone, iPad ёки бошқа қурилмаларини сотиб олсангиз ҳам, улардан фойдаланар экансиз, компания сиз билан пул ишлашни тўхтатмайди. Гап шундаки, Meta, Google ёки бошқалар IT гигантлари каби Apple ҳам ўзининг реклама бизнесига эга ва у кенгайиш арафасида.
Bloomberg'дан Марк Гурманнинг хабар қилишича (The Verge орқали), купертинолик компания ўзининг iPhone ва бошқа қурилмаларидаги олдиндан ўрнатилган Maps (Хариталар), Books (Китоблар) ва Podcasts (Подкастлар) иловаларига ҳам реклама жойлаштиришни режалаштирмоқда. Берилган маълумотларга кўра, рекламалар иловалар ичидаги қидирув натижаларида пайдо бўлади.
Айтиш керакки, Apple шунга ўхшаш реклама моделини App Store дўконида аллақачон жорий қилган: дастурчилар ўз иловалари қидирув натижаларининг энг юқорисида чиқиши учун пул тўлашлари мумкин. Таъкидланишича, Хариталар, Китоблар ва Подкастлар иловаларида пайдо бўладиган рекламалар ҳам шундай тарзда ишлайди. Масалан, Хариталар иловасида ресторанларни қидирувга берсангиз, натижаларнинг энг юқорисида ресторан рекламаси чиқади.
Бундан ташқари, App Store'да аллақачон мавжуд бўлган рекламалар янада кўпайиши кутилмоқда. Маълум бўлишича, Apple ўзининг иловалар дўконидаги "Бугун" саҳифасига каттароқ карта кўринишидаги, шунингдек, маълум бир иловани юклаб олиш саҳифасидаги "Сизга ёқиши мумкин" бўлимига ҳам кўк рангда белгиланган кўринишдаги рекламаларни киритмоқчи (Android учун иловалар дўкони, Google Play Store фойдаланувчилари учун бу янгилик эмас).
Apple'нинг бу ҳаракатлари компания ўзининг реклама бизнесини янада кенгайтиришга интилаётганидан далолат беради. Таъкидлаш жоизки, ўтган йили компаниянинг реклама бизнеси 238 фоизга ўсиб, 3.7 миллиард долларни ташкил қилган.
ЎҚИНГ: Apple сабаб сўнгги Telegram янгиланишидан янги функцияларнинг бири олиб ташланган
