Тим Кук: “Galaxy Note 7 сабаб iPhone’га ўтаётганлар, хуш келибсиз!”
Яқинда АҚШнинг Apple компанияси 2016 йилнинг 3 чораги учун савдо ҳисоботларини эълон қилди. “Олма” ушбу давр мобайнида дунё бўйлаб 45,4 млн дона қурилмаларни сотувга чиқарган. Албатта, бундай кўрсаткичга эришишда Galaxy Note 7 фаблетининг хизматини ҳам истисно қилиш тўғри бўлмайди.
Маълумки, Жанубий Кореялик гигантнинг шу йилнинг август ойида тақдим этган навбатдаги фаблети – Samsung Galaxy Note 7 флагманини ишлаб чиқариш 11 октябрдан эътиборан расман тўхтатилган эди. Бироқ ушбу нуқтагача янги флагман атрофида жуда кучли халқаро резонанс бўлиб ўтди. Модель ёниб кетиши сабаб турли санкцияларга ҳам учради. Натижада Samsung’дан ҳафсаласи пир бўлган харидорлар аста-секинлик билан Apple қурилмаларига ўтишни бошладилар.
Sammobile сайтининг ёзишича, Apple компаниясининг раҳбари Тим Кук SNBC каналига берган интервьюсида Samsung Galaxy Note 7 билан содир бўлган ҳолатни изоҳлаб ўтган. Жумладан, Тим Кук интервьюда шундай деган: “Galaxy Note 7 фаблети янги iPhone’ларнинг муваффақиятига кўрсатган таъсирини баҳолаш жуда қийин. Лекин биз ушбу смартфон сабаб iPhone’га ўтган фойдаланувчиларга хуш келибсиз, деймиз!” – дея фикрини якунлаган Apple раҳбари.
