Тўлиқ рўйхат: Apple девайсларига iOS 11.4 талқини билан қўшилган имкониятлар

Купертинолик техногигант ўз маҳсулотлари учун асосий дастурий таъминот – операцион тизимни ҳам ўзи ишлаб чиқиши ҳамда унинг ҳимояси мустаҳкамлиги билан танилган. Жумладан, 4 июнда бошланадиган WWDC 2018 анжуманида у iOS 12 операцион тизим талқинини тақдим этмоқчи.

ЎҚИНГ: Ниҳоят, Apple расман iPhone SE 2 ва бошқа гаджетлар тақдимотига таклифнома тарқатди!

Шундай бўлса-да, унгача ҳам «тишланган олмали» корпорация ўз операцион тизимини iOS 11.4 талқинигача янгилади. Ушбу янги талқинда Apple гаджетлари учун бир қатор янги имкониятлар тақдим этилган. Уларнинг рўйхати қуйидагича:

1. iMessage’даги хабарлар энди фойдаланувчининг барча Apple қурилмалари – смартфон, планшет, плеер ва компьютер орасида ўзаро синхронлашади. Бунинг учун уларнинг барчасига операцион тизимнинг сўнгги талқини ўрнатилган бўлиши лозим. Бундан кейин хабарлар маҳаллий сақлагичда – қурилма хотирасида эмас, балки «булут»да – Apple сервисида сақланади. Шунингдек, улар икки томонлама криптография тизими билан шифрланади.
2. Янги талқин AirPlay 2 технологиясини ҳам қўллаб-қувватлайди. Мазкур технология бир нечта симсиз акустика тизимларидан мультирум тизимини яратиш ва бутун уйдаги мусиқани бошқариш имконини беради.
3. HomePod колонкаси энди мультирум тизимини қўллаб-қувватлайди. Бундан ташқари, энди уларнинг иккитаси стерео-жуфтлик ташкил этиб, битта колонкадан кўра баландроқ ва сифатлироқ жаранг соча олади.
4. HomePod’га ўрнатилган Siri ёрдамчиси энди календарга воқеаларни қўшиши ва режалаштирилган тадбирларни фойдаланувчига эслатиши мумкин.
5. Операцион тизимдаги ва унда бошидан ўрнатилган иловалардаги майда нуқсонлар бартараф этилган.

Ҳали кечагина – 29 май санасида тақдим этилган iOS 11.4 талқинини ўрнатиб олиш мумкин бўлган Apple девайслари русумлари эса мана бу мақоламизда кўрсатилган.

ЎҚИНГ: iPhone эгалари бир неча йилдан бери кутаётган имкониятлар кейинги ҳафтадаёқ iOS 12’да тақдим этилади!