ТОП-10: Бу гал энди энг кучли смартфонлар бошқа! (AnTuTu рейтинги, 2020 йил февраль)

Эрталаб биз Master Lu бенчмаркига кўра февраль ойининг энг қудратли ўн тўртта смартфони рейтингини эълон қилган эдик. Бироқ энди AnTuTu тақдим этган рейтинг ундан жиддий фарқ қилади.

ЎҚИНГ: AnTuTu’да «Сайёранинг энг қудратли смартфони»ни ҳам «ер тишлатган» янги қирол!

AnTuTu рўйхатида биринчи ўринни салкам 600 баллик натижа билан Xiaomi Mi 10 Pro забт этган; ҳолбуки, Master Lu рейтингида у атиги бешинчи ўриннигина эгаллай олган эди. У ёқда зўрға саккизинчи ўринга илиниб қолган Xiaomi Mi 10 эса бу ерда иккинчи поғонада савлат тўкиб турибди! Айтиш керакки, янги рейтингда фақат мана шу иккаласигина Snapdragon 865 процессори базасига қурилган.

Гувоҳи бўлиб турганингиздек, кучли учликни Vivo iQOO Neo 855 якунлаб берган, унинг ортидан эса айни шу компаниянинг Vivo iQOO Pro 5G смартфони келаётир. OnePlus 7T ҳамда OnePlus 7T Pro жуфтлиги мос равишда бешинчи ва олтинчи ўринларни эгаллаган бўлса, кейинги поғоналардан тегишлича Vivo Nex 3 5G, Honor V30 Pro 5G, Asus ROG 2 ҳамда Realme X2 Pro жой олган.

Samsung яқинда намойиш қилган Galaxy S20, Galaxy S20 Plus ҳамда Galaxy S20 Ultra флагманларининг мазкур рейтингга киритилмаганига сабаб бор. Гап шундаки, AnTuTu аллақачон бозорга чиқиб улгурган смартфонларнинг самарадорлик натижаларини, айнан фойдаланувчиларнинг текширишлари асосида ҳисоблаб рейтинг тузган.

ЎҚИНГ: «Ўйин бошланди» – AnTuTu’нинг янги қироли Xiaomi Mi 10’ни тор-мор этмоқчи!