ТОП-10: Хитой флагманлари барча Galaxy S20’ларни суриб чиқарди! (AnTuTu глобал рейтинги, 2020 йил апрель)

  •   DiMaX
  •  4235
  •  12.05.2020 12:11

ТОП-10: Хитой флагманлари барча Galaxy S20’ларни суриб чиқарди! (AnTuTu глобал рейтинги, 2020 йил апрель)

Боягина биз оммабоп AnTuTu сервисидаги глобал текширувларга кўра ўрта нархли энг зўр смартфонлар рейтингини чиқарган эдик. Мазкур бенчмарк яна, нархидан қатъи назар, энг қудратли флагманлар рўйхатини ҳам тақдим этган.

ЎҚИНГ: iPhone SE 2020 сотувга чиқибоқ AnTuTu’да ҳафсалани пир қилди: Apple’нинг эски касали қўзидими!?

Яқинда эълон қилинган энг қудратли флагманлар ТОП-ўнталиги Хитойдаги фойдаланувчиларнинг AnTuTu текширувларига асосланган бўлиб, ундаги барчаси маҳаллий смартфонсозлар маҳсулоти эди. Қуйидаги рейтинг эса бутун дунёдаги флагманларнинг ушбу бенчмаркдаги текшириб кўришлари асосида, ўртача натижаларга асосланиб тузилган.

Дастлабки учта ўрин энг кучли Android-процессор – Qualcomm компаниясининг Snapdragon 865 платформаси базасидаги смартфонларга тегишли. Хитойча рейтингда зўрға тўртинчи ўринни олган Xiaomi Mi 10 Pro бу ерда 593 769 балл билан етакчи бўлиб утрибди! Иккинчи поғона эса 582 697 баллик натижали OnePlus 8 Pro’га насиб этган. «Хитойча Apple»нинг стандарт флагмани – Xiaomi Mi 10 модели ҳам кучли учликка кирган – 580 027 балл.

Энг қизиғи шундаки, ўтган ойдаги глобал рейтингда дастлабки тўртта, жами олтита ўринни Samsung’нинг янги флагманлари забт этган эди. Бу ойга келиб эса Exynos 990 чипли Galaxy S20 Ultra (519 713 балл) ҳамда Galaxy S20+ 5G (518 494 балл) бир амаллаб тўртинчи ва бешинчи ўринларнигина эгаллашган.

Қолган ўринларда тегишлича қуйидаги флагманлар жойлашган: Asus ROG Phone 2 (Snapdragon 855 Plus, 509 060 балл), Samsung Galaxy S20+ (Exynos 990, 505 071 балл), Samsung Galaxy S20 5G (Exynos 990, 503 324 балл), OnePlus 7T (Snapdragon 855 Plus, 496 700 балл) ва OnePlus 7T Pro (Snapdragon 855 Plus, 496 211 балл).

Етакчи смартфонсозлардан бири – Huawei компаниясининг бирорта ҳам модели на Хитой бозоридаги, на глобал бозордаги энг кучли флагманлар рўйхатига кирмагани ғалати.

ЎҚИНГ: Келажак флагманларининг процессори – Qualcomm Snapdragon 875 ҳақида илк маълумотлар чиқди!

Хабарларни тез ва осон ўқиш учун Андроид иловамизни сақлаб олинг.