«Тошкент шаҳар телефон тармоғи» ўз мобил иловасини ишга туширди
Uztelecom акциядорлик компаниясининг «Тошкент шаҳар телефон тармоғи» филиали ўз абонентлари учун содда ва қулай интерфейсга эга Android мобил илова дастурини ишга туширди. Бу ҳақда Mobinfo.uz хабар бермоқда.
Мобил илова ёрдамида абонентлар тарифлар, Uzonline филиали янгиликлари, IPTV, маҳаллий ва халқаро кодлар, компания томонидан тақдим этилаётган қўшимча кўринишдаги хизматлар кодларини билиб олишлари мумкин.
Абонент рўйхат (регистрация)дан ўтганидан сўнг ўзи дуч келган муаммоларни тезда ҳал этиш учун илова орқали шикоят ва таклифлари билан мурожаат қилиш, шунингдек, компания фойдаланаётган ижтимоий тармоқларидаги алоқа каналларидан ҳам фойдаланиш имкониятига эга бўлади.
Иловадан Android 4.0 ва операцион системанинг кейинги талқинлари ўрнатилган қурилмалар эгалари фойдалана олади.
Мобил иловани Google Play онлайн дўконидан бепул (8,4 Мб) юклаб олиш мумкин.
