Тошкентда тўқимачилик технопарки қурилади

Тошкентда тўқимачилик илмий-тадқиқот технопарки бунёд этиш ишлари бошланди. Лойиҳани “Ўзбекенгилсаноат” АК ҳамда Корея Республикаси Савдо,саноат ва энергетика вазирлиги амалга оширади.

Лойиҳага кўра, ўз лабораториясига эга бўлган илмий-тадқиқот институти ва ушбу технопарк Тошкент тўқимачилик ва енгил саноат институти ёнида жойлашади. Тўқимачилик технопарки бунёд этишдан мақсад халқаро илмий-тадқиқот дастурларини Тошкент тўқимачилик ва енгил саноат институтига (ТТЕСИ) жорий этиш; ўзбек мутахассисларини илғор ахборот коммуникацион технологиялардан фойдаланишига кўмак беришдир.

Айтиб ўтиш керакки, лойиҳанинг дастлабки чизмаси тайёр бўлди. Унда маъмурий бино, конференция ва кўргазма заллари, тажриба лабораториялари, тикиш, тўқиш, бўяш хоналари акс этган. Бинонинг томи ва ёндош ҳудудлар кўкаламзорлаштирилади, қаршисида фаввора жойлашади.