Тошкентдаги автобусларга текин Wi-Fi ўрнатилди

Тошкент шаҳридаги 14-йўналиш (ТТЗ-Шимолий вокзал бўйлаб ҳаракатланувчи) автобусларига илк бор интернетдан текин фойдаланиш имконини берувчи Wi-Fi ўрнатилди. Бу ҳақида ижтимоий тармоқ фойдаланувчилардан бири potrebitel.uz гуруҳида маълум қилган.

Бу хабар кўпчиликни қувонтиргани ёзилаётган изоҳларда ҳам акс этган. Кимдир хабар берувчининг ёзганларига ишонқирамай муносабат билдирган бўлса, кимдир бу хабар соҳа ривожидаги катта ва муҳим қадамлардан бири, деб баҳо берган.

Мазкур технологиядан фойдаланганларнинг айтишича, барча хизматлар яхши ишламоқда, пароль мавжуд эмас. Истаган йўловчи Wi-Fi тизимига кириб, интернетдан бепул фойдаланиши мумкин.

Хабар қолдирган фойдаланувчи автобус ичидаги Wi-Fi ҳақидаги суратни ҳам келтирган. Унда “Бу автобусда Wi-Fi бор”, дея ёзилган ва уланиш мумкин бўлган тармоқ номи (“WI-FI-BUS”) кўрсатилган.

Текин интернет фойдаланувчиларининг қизиқишлари сабаб мазкур йўналишдаги транспортларда тирбандлик кузатилиши мумкин.