Twitter эски йўл билан верификация қилинган барча аккаунтлардан кўк тасдиқланганлик белгисини олиб ташлади – "улкан тозалаш" ҳақида билишингиз керак бўлган барчаси

Twitter эски йўл билан верификация қилинган барча аккаунтлардан кўк тасдиқланганлик белгисини олиб ташлади –

Ижтимоий тармоқлар пайдо бўлгандан бери улардаги айрим аккаунтларнинг номи олдида кўк тасдиқланганлик белгисининг бўлиши бу ушбу аккаунт ортидаги таниқли шахс ҳақиқатда ўша эканлигини исботланганлигини ёхуд унинг номидан очилган бошқа профиллар сохта эканлигини билдиради. Бироқ, бугунги кунга келиб Илон Маск бошчилигидаги Twitter ижтимоий тармоғида, эҳтимол, унинг тарихида илк бор бу энди бошқача маънога эга – кўк рангли "галочка"си борми? Унда у бунинг учун ойига 8 доллар тўлайди.

Жорий йилнинг 20 апрел куни Twitter ўзининг эски йўл билан верификация қилинган аккаунтларининг барчасидан кўк тасдиқланганлик белгисини олиб ташлади. Бу Илон Маск ижтимоий тармоқ "тахти"га келишидан олдинги даврнинг энг сўнгги қолдиқларидан бири эди десак адашмаган бўламиз. Аслида, бу 1 апрел куни содир бўлиши керак эди, лекин ўша куни таниқли The New York Times нашридан бошқа деярли ҳеч кимдан эски тасдиқланганлик белгиси олиб ташланмади ва "улкан тозалаш" 20 апрел санасига қолдирилган эди.

Эски йўл билан верификация қилинган аккаунтлардан тасдиқланганлик белгиси олиб ташлангандан сўнг, Twitter'да фақат Blue ойли обунасига эга бўлганларда кўк, ҳукумат вакилларида кулранг ва бизнес эгаларида эса олтин рангли тасдиқланганлик белгилари қолди. Ишониш қийин, лекин энди Twitter'даги 100 миллиондан ортиқ обуначига эга қўшиқчи Жастин Бибер, португалиялик футболчи Криштиану Роналду ва қўшиқчи Кети Перри аккаунтларида ҳам кўк верификация белгиси мавжуда эмас. Ҳатто, Рим Папаси ҳам "улкан тозалаш"дан четда қолмаган эди, лекин бироз вақт ўтгач унга "ҳукумат ёки кўп томонлама ташкилот аккаунти" учун бериладиган кулранг тасдиқланганлик белгиси берилди.

Тасдиқланганлик белгиси олиб ташланган аккаунтлар қаторида яна миллиардер Билл Гейтс, АҚШнинг собиқ президенти Доналд Трамп, модел Ким Кардашиан, қўшиқчи Beyonce ва актёрлардан Леонардо Ди Каприо, Том Круз, Самуел Жексон, Жереми Реннер, Крис Эванс ва яна бошқа жуда кўпчилик бор.

Маълум бўлишича, айрим машҳурларнинг, гарчи улар аввал очиқчасига Twitter Blue обунасига пул тўламасликларини айтишган бўлса ҳам, "галочка"лари сақлаб қолинган, чунки улар Twitter Blue обунасини сотиб олишган. Гап шундаки, америкалик профессионал баскетболчи, ЛеБрон Жеймс ўтган ойда Twitter Blue учун пул тўламаслигини маълум қилган эди. Бироқ "эски кўк белгилар апокалипсиси"дан кейин ҳам унинг кўк верификация белгиси сақлаб қолингани маълум бўлди, чунки у Twitter Blue'га обуна бўлгани учун. Таниқли америкалик муаллиф, Стивен Кинг ҳам Twitter Blue учун пул тўлашни рад қилган эди, лекин унинг ҳам тасдиқланганлик белгиси Twitter обунасини сотиб олгани учун сақлаб қолинган, бироқ Стивеннинг ўзи буни рад этади:

"Менинг Twitter аккаунтим мени Twitter Blue'га обуна бўлганимни айтяпти. Мен бундай қилмадим. Менинг Twitter аккаунтим мени телефоним рақамимни берган деяпти. Мен бундай қилмадим." 

Илон Маск эса Стивен Кингнинг бу твитига "Арзимайди, намасте 🙏" дея жавоб қолдирган.

Кейинчалик аниқлашича, Илон Маскнинг ўзи бир нечта одамларга, хусусан, Уилям Шатнер, ЛеБрон ва Стивен Кинг учун Twitter Blue обунасига "шахсан" пул тўлаган. Рианна ва Тейлор Свифт ҳам аккаунтларида ҳам кўк верификация белгиси Twitter Blue сабаб сақлаб қолинган, бироқ бу ҳам Илон Маск ҳимматиданми ёки улар ростдан ҳам бунинг учун ўзлари пул тўлашганми, буниси номаълум.

Албатта, бундан ҳамма ҳам хурсанд эмас. Ўзининг Twitter саҳифасида қўшиқчи Doja Cat шундай дейди: "Эндиликда кўк белгига эга бўлиш сизнинг бутунлай омадсизлигингиз юқори эканлиги ва таниқли одамлар каби тасдиқланишни жуда хоҳлаётганингизни англатади". Унинг қўшимча қилишича "одамлар кўк белгини ўзларини муҳимдек ҳис қилиш учун сотиб олишади, бирон-бир мазмунли нарса яратганликлари учун эмас".

Илон Маск ўтган йили Twitter'ни 44 миллиардга сотиб олгандан кейин ижтимоий тармоқнинг верикациялаш тизими эскирган, коррупцияга ботганлигини ва уни "бойлар & камбағаллар тизими" деб айтган эди. Хўш, у энди адолат ўрнатдими? Ахир энди ҳозир бой ҳам камбағал ҳам бирдек кўк белгига эга ёки эга эмас-ку? Эҳтимол, бу ижтимоий тармоқнинг қулашидан бошқа ҳеч нарсага ёрдам бермайди. 

Шундай қилиб, Twitter'да энди кўк верификация белгисининг энди олдингидек қадри йўқ. Ижтимоий тармоқ расмий лекин тасдиқланганлик белгиси олиб ташланган аккаунтлар билан тўлди ва бу аллақачон фирибгарлик, ўзганинг, хоссатан машҳур шахслар ва ташкилотлар номидан аккаунт очиш ва нотўғри маълумотлар тарқатишга ёрдам беришни бошлади.

Twitter Blue ойлик обунасини сотиб олиш нафақат кўк тасдиқланганлик белгиси, балки твитларни таҳрирлаш, кўпроқ белгили твитлар ёзиш, 50% га камроқ рекламалар кўриш ва яна бошқа бир нечта афзалликлар беради.

Terabayt.uz сайтининг видеолари: Youtube'даги каналимизда!