Twitter'да тасдиқланганлик белгисини пулга сотиб олишингиз мумкин бўлади
Сўнгги ўн кундан бери интернетда Twitter ва Илон Маск ҳақида кўплаб янгиликларда айланиб юрибди. Ҳозиргача миллиардернинг ижтимоий тармоқни расман сотиб олгани ва компания раҳбарларини ишдан бўшатгани, шу билан бирга, зудлик билан Twitter маҳсулотларига ўзгартиришлар киритишни бошлаб юборгани ҳақида эшитдик. Эҳтимол, ушбу янгиликлар орасида Twitter'нинг Blue обунаси нархининг ошиши энг эътиборли ўзгаришлардан бўлди.
Аввалроқ Илон Маск Twitter Blue обунаси нархини 19.99 долларга ошириши, шунингдек, унга платформада тасдиқланганлик белгисини қўшиб беришини ҳақидаги хабарлар тарқалган эди. Эндиликда миллиардер ўзининг расмий Twitter саҳифасида айтишича, Twitter Blue обунаси АҚШда ойига 8 доллар бўлади ва у тасдиқланганлик белгиси билан бирга қуйидаги хусусиятларни ҳам ўз ичига олади:
- жавоблар, белгиланишлар ва қидирувларда спам/фирибгарликни енгишда муҳим ҳисобланадиган устуворлик
- кўп вақтли видео ва аудио жойлаштириш имконияти
- ярим рекламалар (яъни бунда оддий фойдаланувчидан кўра камроқ реклама кўрсатилади)
"Twitter'нинг ҳозирги лордлари & деҳқонлари ёхуд кўк белгига эга ёки эга бўлмаганлар тизими беъманиликдир. Куч одамларга! (Twitter) Blue ойига 8 доллар" дейди Илон Маск.
Маскнинг қўшимча қилишича, обуна нархи "мамлакат томонидан сотиб олиш қобилияти паритетига мутаносиб равишда созланган". Қолаверса, бу Twitter'га контент яратувчиларни мукофотлаш учун даромад оқимини беради.
Шунингдек, миллиардер Twitter билан ишлашга тайёр нашриётлар учун тўловни четлаб ўтиш имкониятини, ҳамда, таниқли шахс номлари остида иккинчи даражали тег бўлишини ҳам маълум қилди.
Янги нарх ва ўзгаришлар қачондан амалга оширилиши ҳозирча номаълум, аммо Twitter'га энди Илон Маск эгалик қилаётган экан ўзгаришлар ҳар сонияда бўлиши мумкин.
ЎҚИНГ: Илон Маск йил охиригача Twitter'нинг TikTok рақобатчиси – Vine'ни "қайта тирилтиради"
