У қайтди! Meizu компанияси расман ўзининг янги флагманларини тақдим қилди!

Орада бир йиллик танаффусдан сўнг Meizu ўзининг йигирма йиллик юбилейида янги логотип билан яна телефонлар бизнесига қайтди. Компания ўзининг Meizu 18 сериясидаги смартфонларидан кейин Meizu 19 қаторини ўтказиб юборди ва кеча Meizu 20 смартфонларини расман тақдим қилди.

Meizu 20 серияси, маълум бўлишича, учта моделни ўз ичига олади: Meizu 20, Meizu 20 Pro ва Meizu 20 Infinity. Қатордаги бошланғич модел, 6.55 дюймли OLED экранга эга ва у FHD+ резолюциясида бўлиб, 144 герц янгиланиш тезлигини қўллаб-қувватлайди.

Pro модел эса 1368×3192 (2К+) пикселлар ўлчами, 1-120 герц янгиланиш тезлиги, ҳамда, HDR10+ қўллаб-қувватланишига эга бўлган 6.81 дюймли LTPO OLED дисплей билан жиҳозланган ва у 1800 нит максимал ёруғликка чиқа олади. Infinity версиясига келсак, унинг 6.79 дюймли экрани Pro моделники каби хусусиятларга эга фақат у тўрт томондан ингичкароқ, 2.48 мм қалин рамкали экран билан таъминланган. Уччала моделларнинг ҳам экрани остида ултрасоник бармоқ изи сканери мавжуд, шу билан бирга, уларнинг экран юқори марказида жойлашган селфи камералари ҳам бир хил, 32 MP.

Meizu 20 Pro орқа томонида учта 50 мегапикселли камералар тизимига эга – асосий, ултра-кенг ва телефото линзалар. Infinity моделининг ҳам асосий камераси 50 MP, лекин қолган ултра-кенг ва телефото сенсорлар 12 MP. Оддий моделнинг асосий камераси сифатида эса Samsung компаниясининг 50 мегапикселли GN5 сенсори ўрнатилган. Қолганлари эса 16 MP ултра-кенг ва 5 MP қўшимча камералардир.

Meizu 20 нинг учлик камералари жойлашуви бир қарашда Galaxy S23 смартфонини эслатиб юборади, лекин сиз бу Meizu 20 эканлигини унинг учинчи камераси атрофини ўраб турган ҳалқа, яъни LED чироғидан билиб олишингиз мумкин. Бу ҳалқа Meizu 20 Pro моделида алоҳида оролда туради. Infinity моделда эса у ҳалқа эмас ва уни жойлашган камера ороли ҳам бўртиб чиқмаган.

Meizu ўзининг уччов янги смартфонини ҳам Qualcomm'нинг Snapdragon 8 Gen 2 чипсети билан таъминлаган. Шунингдек, қурилмалар LPDDR5Х ва UFS 4.0 хотира технологияларида Android 13 га асосланган Flyme 10 операцион тизимида ишлайди.

Батареяга келганда биз яна смартфонлар ўртасидаги фарқни кўришимиз мумкин. Meizu 20 модели 4700 мА/соат батареяга эга ва у 67 Вт тезликда қувватланади (45 дақиқада 100% бўлиши ваъда қилинмоқда). Meizu 20 Infinity эса 4800 мА/соат батарея билан 65 Вт симли ва 50 Вт симсиз зарядланиш қўллаб-қувватланиши билан келади.

Қатордаги энг катта батареяга эга смартфон Pro модел бўлиб, у 5000 мА/соат қувват кучига эга ва уни 80 Вт тезликда симли (39 дақиқада 100%), ҳамда, 50 Вт тезликда симсиз (52 дақиқада 100%) зарядлаш мумкин.

Алоқа ва уланиш борасида эса смартфонлар иккилик 5G ва Wi-Fi 7 технологияларини қўллаб-қувватлайди.

Нархлар қуйидагича:

Meizu 20 смартфонлари сотуви Хитойда 3 апрелдан бошланади.