Ubisoft бир нечта янги Assassin's Creed ўйинларини эълон қилди!

Ubisoft бир нечта янги Assassin's Creed ўйинларини эълон қилди!

Сентабрнинг илк кунида Ubisoft расман Assassin's Creed ўйинининг навбатдаги қисми Mirage бўлишини ва унинг постерини улашган эди, лекин бу шунчаки хамир учидан патир эди холос. Кеча бўлиб ўтган Ubisoft Forward тадбирида эса компания бир қанча бошқа янгиликлар билан бирга навбатдаги Assassin's Creed ўйинларини ҳам эълон қилди. 

Assassin's Creed: Mirage ўйинидан бошлайдиган бўлсак, Ubisoft тадбир давомида янги ўйиннинг кинематографик трейлерини чиқарди. Маълум бўлишича, ўйинчилар ушбу ўйинда IХ асрдаги Боғдодга қайтишади ва Басим ибн Исъҳақ ролига ўтадилар. Агар сиз Assassin's Creed: Valhalla ўйинини ўйнаган бўлсангиз бу исм сизга таниш, ёхуд Mirage ўйини Valhalla'дан 20 йиллар аввалги воқеаларни ўз ичига олади.

Янги ўйинда ҳаракат-саргузашт жанрига қайтилади, яъни Mirage'да яқинда чиқарилган АC ўйинларида бўлгани каби RPG хусусиятлари эмас, балки яширинлик, паркур ва ассассинлик мужассамдир. Афсуски, Mirage'нинг аниқ чиқарилиш санаси мавжуд эмас, лекин Ubisoft уни 2023 йилда Xbox Series X|S, Xbox One, PS5, PS4, компютерга чиқарилиши кутилмоқда.

Айтиш керакки, Mirage тадбир давомида кўрсатилган ягона Assassin's Creed ўйини эмас. Ubisoft франшизанинг келажакдаги яна бир нечта катта ўйинларини ҳам эълон қилди.

Уларнинг бири "Red" (қизил) код номли ўйин бўлиб, у Ubisoft'нинг Quebec студияси томонидан ишлаб чиқилмоқда. Берилган маълумотларга кўра, воқеалар Япониянинг феодал даврида содир бўлади ва у кўпроқ RPG'лашган бўлади.

Шунингдек, компания "Hexe" код номли яна бир Assassin's Creed ўйинини ҳам тақдим қилди. Ушбу ўйин эса Ubisoft'нинг Montreal жамоаси томонидан тайёрланаётган бўлиб, ҳозирча у қандай бўлиши ҳақида маълумотлар мавжуд эмас, лекин трейлердан ўйинга жодугарлик аралашганлигини кўриш мумкин.  

Ушбу икки асосий ўйинлар серияси келажакда Assassin's Creed Infinity платформасига жойланади, яъни Infinity бўлажак АC ўйинларига кириш маркази сифатида хизмат қилади, шу билан бирга, Infinity доирасида Invictus код номли хусусият ўйинчиларга кўпчилик бўлиб ўйнаш имконини қайтариб беради.

Булардан ташқари, Ubisoft яна бир Assassin's Creed бепул ўйини смартфонлар учун чиқарилиши ҳам маълум қилди. Код номи "Jade" бўлган ушбу ўйин воқеалари қадимги Хитойда бўлиб ўтади. Таъкидланишича, унда ўйинчилар ўз қаҳрамонларини созлашлари, Буюк Хитой девори бўйлаб паркур қилишлари мумкин бўлади.

Қўшимчасига, Ubisoft компанияси Netflix'нинг мобил гейминг хизмати учун эксклюзив бўлган яна бир Assassin's Creed ўйинини чиқариши маълум бўлди. Ҳозирда, икки компания Assassin's Creed'га асосланган сериал устида ҳам ишлашмоқда.

ЎҚИНГ: iPhone 14 моделларига олдиндан буюртма бериш бошланди

Сайт янгиликларидан доимий хабардор бўлиш учун Телеграм каналимизга қўшилинг!