Уч экранли Galaxy X буклама смартфонининг тақдимот вақтини айтишди
Жанубий кореялик корпорация ўзининг букланувчи смартфони – Galaxy X моделини CES 2018 кўргазмасида тақдим этишини кўпчилик кутган эди. Аммо бу тадбирда унинг расмий намойиши бўлиб ўтгани йўқ, фақат қанақадир ёпиқ йиғилишда Samsung айрим кишиларга ушбу телефонни кўрсатгани айтилмоқда.
ЎҚИНГ: Samsung ўзининг Galaxy X буклама смартфонини «махфий йиғилиш»да кўрсатди
Шу кунларда тарқалган хабарларга кўра, Galaxy X қурилмаси букланувчи, ҳар бирининг диагонали 3.5 дюймлик иккита экранга эга бўлади. Қурилма «очилганида», улар бирлашиб, 7 дюймлик яхлит дисплейга айланади. Янги смартфон шу ҳолида Galaxy Note 8 моделига кўпроқ ўхшаб кетиши айтилаётир.
Шунингдек, Galaxy X ташқи томонида яна битта мини-экран ҳам жойланади. Смартфон «ёпилганида», бу экранчада ҳар хил тезкор маълумотлар: билдиришномалар, қўнғироқлар, SMS ва бошқалар акс этади.
Samsung аллақачон бу модел устидаги ишларнинг якунига яқинлашиб қолган, демоқда манбалар. Galaxy X синов намуналари шу йилнинг июнида тайёр бўлади, ноябрь ойида эса уни ишлаб чиқара бошлашади. Девайснинг тақдимоти 2019 йилнинг бошида бўлиб ўтиши кутилмоқда.