Уч объективли камерага эга iPhone’ларни томоша қиламиз!
Хабарингиз бор – Huawei компанияси учта модулли камерага эга бўлган дунёдаги илк телефон – P20 Pro моделини яқиндагина тақдим этганди. Энди жорий йилда бу ҳолат етакчи (ва хитойлик) смартфонсозлар орасида урфга кириши мумкин.
Жумладан, айрим хабарларга кўра, купертинолик гигант ҳам уч объективли бош камерага эга бўлган iPhone устида иш бошлаган. Афтидан, кам ёритилган шароитларда ҳам яхши суратга олувчи, оптик зум сифатини яхшилашга ёрдам берувчи мазкур технологияга Apple ҳам қизиқиб қолган кўринади.
ЎҚИНГ: iPhone Android'нинг муҳим жиҳатини ўзлаштиради
Ҳозирча «учкўз» iPhone ҳақида бирор расмий хабар чиқмаган бўлса-да, дизайнерлар унинг ташқи кўриниши борасида фантазия қилиб кўришди. Жумладан, iDropNews ресурсида шундай айфонларнинг концепт суратлари эълон қилинди.
Дизайнерлар хаёлоти маҳсули бўлган ушбу смартфонларнинг умумий кўриниши iPhone X услубида. Аммо камера модулларининг жойлашуви бўйича турли вариантлар таклиф этилган. Бунда учта объектив битта умумий модулга жойланган шаклда ҳам, биттаси алоҳида жойлашган кўринишда ҳам вариантлар бор.
Айни дамда iPhone X бош камерасининг иккинчи сенсори тасвирни оптик катталаштириш учун қўлланади. Агарда қачондир Apple чиндан ҳам уч модулли камерага эга айфон ишлаб чиқарса, унга учинчи объектив сифатида монохром сенсор қўшилса керак.
Айтиб ўтиш ўринлики, Google ҳамда Samsung ҳозирча ўз смартфонларида сенсорлар сонини кўпайтирмасдан, бунинг ўрнига тасвирни қайта ишлаш алгоритмларини такомиллаштирмоқдалар.
ЎҚИНГ: Топ-10: 2018 йилнинг кучли камерафонлари ва юртимиздаги нархи
