Учинчи чоракда смартфонлар савдосидаги энг катта ўсиш қаерда кузатилди?
Куни кеча Canalys таҳлил фирмаси 2019 молия йилнинг учинчи чорагига доир навбатдаги ҳисоботини эълон қилди.
Унга кўра, ўтган кварталда смартфонлар савдоси бўйича дунёдаги энг катта ўсиш Европа бозорида кузатилган. Бу ҳақида GSMArena сайти хабар бермоқда.
Ўтган чоракда Европага етказиб берилган жами смартфонларнинг энг катта улуши (30.4%) Samsung ҳиссасига тўғри келган. Бу кўрсаткич билан эса компания 2018 молия йилининг учинчи чорагига нисбатан 26% лик ўсишга эришган. Ўтган йилнинг мос даврида корейс компанияси 14.8 миллион смартфон етказиб берган эди.
Иккинчи чоракда Европага 8.5 миллион ақлли мобил қурилма етказиб берган Huawei эса (АҚШ тақиқига қарамай), 11.6 миллион дона смартфон сотишга эришган. Шундай бўлсада, компания умумий молия йили ичида савдолар ҳажми бўйича ўсишга эришмади. Лекин шунда ҳам, Европа бозорининг 23.9% улушига эгалик қилиб, иккинчи ўрнини сақлаб қола олди.
9.8 миллион iPhone сотган Apple эса учинчи ўринни эгаллади. Лекин йиллик савдолар ҳажми ўтган йилгига нисбатан 4% кам бўлди.
Йиллик 73% ўсишга эришган Xiaomi эса 5.5 миллион дона смартфони билан тўртинчиликни ва бозорнинг 10.5% улушини эгаллади.
HMD Global эса 0.9 миллион дона қурилмаси билан бешинчи ўринни банд этди ва бозордаги 1.8% улушга эгалик қилди. Йиллик 21% пасайишни бошдан ўтказган бу компания 2018 йилнинг учинчи чорагида 1.2 миллион смартфон сотиб, бозордаги савдоларнинг 2.4% қисмига эгалик қилган эди.
