Ulo ёқимтой ўйинчоқми ёки гениал кашфиёт?
Смартфонлар янгидан-янги функциялари ва имкониятлари билан бизни ҳайратлантиришдан тўхтамаяпти. Аммо смартфондан бутунлай фарқ қилувчи янги қурилмада оғизни ланг очишга мажбур қилувчи функциялар бўлса-чи.
Танишинг – Ulo. Катталиги тухумдай келадиган хавфсизлик камераси ажабтовур бойўғли кўринишида ишланган. Бойўғли тушмагур кўзини пирпирата олади, ола-кула қилади. Шу холосми? Йўқ, албатта.
Бойўғлининг кўзлари LCD экрандир, қорачиғи катталигини ва кўз нурини махсус илова ёрдамида ўзгартириш мумкин. Аммо бойўғлича хуфёна посбонлик вазифасини ҳам бажара олади. Ундаги камера (асли ўйинчоқ бойўғлида камера борлигини ўғри туш кўрибдими) зарур ҳолатда объект ҳаракатини аниқлаб, видеога олиши ва электрон почтангизга жўнатиши мумкин. Буйруғингизга кўра суратга олади. Кўпгина режимларга эга. Фақат бино ичига эмас, кўчага ҳам ўрнатиш мумкин.
Ёмғир ёғадиган бўлса, кўзини юмиб олади ёки кун давомида рангини ўзгартириб туради.
Аслида, камера унинг шаффоф тумшуғида. Тумшуқ юзаси ойна, йиғувчи линза ҳисобида ишлайди. Пастроқда микрофон, Uloнинг ориентация олувчи ва ҳаракатни аниқловчи датчиклари бор. Wi-Fi модуль ва литий-полимер аккумуляторни USB-порт ёки розеткадан зарядласа бўлади. Камера заряди оз қолса, бойўғлининг кўзлари мудраб қолади. Заряди, тахминан, икки кунга етади.
Марҳамат, томоша қилинг.
Uloни исталган жойга ўрнатаверасиз – таглигини горизонтал ёки вертикал сиртга тўртта магнити билан ёпиштириш кифоя. Унга эса яна магнит ёрдамида камерани маҳкамлайсиз. Тўғри, бу қурилмани кўчада ўғирлаб кетишлари мумкин, аммо зукко ўғри бу матоҳ камера эканлигини аввал билиши керак, қолаверса, ўғрининг расмини дарҳол эгасининг электрон почтасига жўнатади.
Бойўғли тез орада 199 евро нарх билан сотувда пайдо бўлади.
