“Ўзбекистон ҳаво йўллари” бортларида Samsung Galaxy Note 7 смартфонини ташиш тақиқланди
“Ўзбекистон ҳаво йўллари” компанияси ўз самолётларига Малайзиядан юртимизга учиб келаётган йўловчилар учун Samsung Galaxy Note 7 смартфонини олиб чиқишни чеклаб қўйди.
Малайзия давлат авиация назорати ташкилотининг махсус кўрсатмасига биноан, парвозларнинг хавфсизлигини таъминлаш мақсадида, Малайзиядан “Ўзбекистон ҳаво йўллари” авиаташувчисининг бортларида юртимизга учиб келадиган йўловчиларга Samsung Galaxy Note 7 моделини самолётга олиб чиқиш ва ташиш тақиқланган.
Жанубий Корея компаниясига тегишли мазкур смартфон билан содир бўлган сўнгги ёниб кетиш ҳолатлари бунга сабаб бўлганлиги қайд этилади. Йўловчилар миллий авиакомпания рейслари орқали Малайзиядан учаётган самолётларда мазкур смартфонни қўл юкида олиб чиқиш, юкхонага топшириш ёки жўнатма сифатида юбора олмайдилар.
Миллий авиаташувчининг сайтида берилган хабарда бундай чеклов фақат Малайзиядан учиб келадиган рейслар учун амал қилиши қайд этилган.
Эслатиб ўтамиз, 11 октябрь куни Samsung компанияси Galaxy Note 7 моделини ишлаб чиқаришни расман бутунлай тўхтатиши ҳақида маълум қилган эди.
