Ўзбекистонда интернет тезлиги билан боғлиқ муаммолар ноябрда ҳам давом этади

Ўзбекистонда интернет тезлиги билан боғлиқ муаммолар ноябрда ҳам давом этади

Ўзбекистонда ноябрь ойида ҳам интернет тармоғи ишлаш тезлигининг ёмонлашиши ва сайтларга киришда муаммолар туғилиши давом этади.

“Ўзбектелеком” АК хабарига асосланиб Kun.uz’нинг ёзишича, 2015 йилнинг 1-30 ноябрь кунлари “Ўзбектелеком” АК ҳамкорлари тармоқларида тузатиш ишлари олиб борилиши муносабати билан интернет сифати ёмонлашиши мумкин.

Компания мижозларидан вақтинчалик ноқулайлик учун узр сўраган.

“Ўзбектелеком” АКнинг бундай мурожаатлари Ўзбекистонда мунтазам характерга эга бўлиб, ўтган йиллар давомида кўп маротада шу каби “таъмирлаш” ишлар олиб борилиши эвазига интернет сифати доимий равишда паст бўлиб келмоқда.

ОАВ хабарларида келтирилишича, Ўзбекистонда маълумотларни юклаш тезлиги 2.44 Мб/секундни ташкил қилади, бу жаҳондаги 188 мамлакатни қамраган рейтингда 170- ўрин демакдир. Биринчи ўринда турган Гонгконгда – 69.38 Мб/секунд, Сингапурда – 59.53 Мб/секунд. Россия 30-ўринда (21.09 Мб/секунд), Хитой 16.64 Mб/секунд тезлик билан 43-ўринда, Қозоғистон эса 52-поғонада (13.71 Мб/секунд), 80-ўринда – Қирғизистон (8.46 Мб/секунд) турибди.

Компания вакилларининг сўзларига кўра, “линияларимиз “Ростелеком” ва “Қозоқтелеком” орқали ўтади, биз охирги нуқтадамиз. Биз Қозоғистондан тезлик сотиб оламиз ва бу трафик интернет провайдерларига берилади. Бизнинг вилоятимизда бундайлар сони олтита. Тарифлар ҳам шундан келиб чиқади – тезлик қанча баланд бўлса, нарх ҳам шунча қиммат”.

Сайт янгиликларидан доимий хабардор бўлиш учун Телеграм каналимизга қўшилинг!