Ўзбекистондаги мобил операторларига алоқа сифатини яхшилаш топширилди
Ўзбекистонда фаолият кўрсатаётган тўртта мобил алоқа операторига алоқа хизматларининг қониқарсиз ҳолати юзасидан тегишли кўрсатмалар берилди. Бу ҳақда Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси (Инспекция) расмий сайтида хабар берилди.
Хабарда қайд этилишича, инспекция “Электромагнит мослашув маркази” ДУК билан ҳамкорликда ўтказилган радиомониторинг ҳамда операторлар томонидан тақдим этиладиган тармоқ сифат кўрсаткичлари тўғрисидаги ойлик ҳисоботларни ва таянч станцияларнинг тўхталишлари бўйича маълумотлар, шунингдек, келиб тушган мурожаатлар таҳлили натижаларига кўра бир қатор качиликлар аниқланди, хусусан: – мобил алоқа хизматлари сифат кўрсаткичларининг белгиланган меъёрларга мувофиқ эмаслиги; – абонентларга мобил алоқа хизматларидан туну-кун фойдаланиш имконияти яратилмаганлиги; – аҳоли кам истиқомат қиладиган ҳудудларни мобил алоқа билан тўлиқ қамраб олинмаганлиги, бу эса ўз навбатида ушбу ҳудудларда истиқомат қиладиган аҳоли томонидан бўладиган мурожаатлар сонининг кўпайишига олиб келаётганлиги.
Инспекция юқоридаги қамчиликларга йўл қўйган “COSCOM” МЧЖ ХК (Ucell савдо белгиси), “Unitel” МЧЖ (Beeline с.в.), “RWC” МЧЖ ХК (Perfectum с.б.) ва “Ўзбектелеком” АК (Uzmobile с.б.) мобил алоқа операторларга Ўзбекистон Республикасининг амалдаги қонун ва меъёрий ҳужжатлари талабларига мувофиқ мобил алоқа хизматини кўрсатилишини таъминлашлари юзасидан кўрсатмалар тақдим этди.
