Вақтинча бепул тарқатилаётган GTA V ўйинини ўта реалистик версияда чиқаришди! (видео ва ҳавола)
Коронавирус пандемияси туфайли карантин шароитида кишилар уйларида қолишлари учун турли ўйин студиялари ўз маҳсулотларини бепул тарқатишмоқда. Epic Games дўкони энг қизиқарли экшен ўйинлардан бири – Grand Theft Auto 5’ни текинга тарқатяпти!
ЎҚИНГ: Google Play’дан нақ 16 та ўйинни бепул олишга улгуринг! (тайёр ҳаволалар)
Таъкидлаш керакки, GTA V яратилганидан буён салкам етти йил ўтган ва ўшандан бери у айтарли ўзгармаган. Компьютер графикаси имкониятлари эса бу даврда анча илгарилаб кетган; шу боисдан оригинал Grand Theft Auto 5 ҳозирги нуқтаи назардан эскирган графикага эга.
Шуни инобатга олиб, Razed никли дастурчи ушбу оммабоп ўйиннинг NaturalVision Evolved номли мод (ўзгартирилган) версиясини яратди. Реалистик графикага эга бўлгани учун, у оригиналидаги сингари мультфильмга эмас, балки энди юқори бюджетли сифатли фильмга ўхшаб чиққан:
Ушбу мод туфайли GTA 5 ўйинида янги текстуралар пайдо бўлган: улар майда деталларгача аниқ кўришни, объектларнинг чуқурлиги ва умумий реаллигини таъминлайди. Булардан ташқари, NaturalVision Evolved реал вақт режимида яратилувчи эффектлар – соялар, акслар, ёритилиш даражаси ва бошқаларни ҳам қўллаб-қувватлайди.
Ҳозирги ҳолати ҳам чакки бўлмаса-да, Razed таъкидлашича, NaturalVision Evolved ҳали бошланғич босқичда бўлиб, такомиллаштириб борилади. Шунингдек, у юқоридаги трейлерда моднинг барча имкониятлари кўрсатилмаганлигини, ўйиннинг ўзида графика янада зўр эканлигини айтган.
NaturalVision Evolved версиясидаги GTA 5 ўйинини синаб кўриш учун мана бу ҳавола орқали Patreon ресурсидаги Razed саҳифасига (пулли) обуна бўлиш керак.
