«Viber» асосчилари Ўзбекистонга келади

АҚШ, Исроил ва Беларуснинг ахборот технологиялари соҳасидаги етакчи экспертлари «Mirzo Ulugbek Innovation Center» таклифига кўра Ўзбекистонга келишяпти. Булар орасида «Viber» асосчилари — Марко Талмон ва Игорь Магазинник, «Strategeast» компанияси президенти Анатолий Моткин ҳамда АҚШнинг «International Tax and Investment Center» компанияси минтақавий директори Муҳит Ахановлар бор, деб ёзади Xabar.uz.

Ташриф 28-29 май кунларига мўлжалланган бўлиб, бу ҳақда Ўзбекистон ҳукумат делегацияси ўтган йилнинг сентябр ойида АҚШга борганида келишиб олинганди.

Экспертлар  Ўзбекистонга нафақат танишиш мақсадида келишяпти, балки амалий аҳамиятга эга режалари ҳам бор:

• Хусусан, улар Ўзбекистондаги солиқ қонунчилиги ва ислоҳотлари билан танишадилар, халқаро тажриба асосида ахборот технологиялари жиҳатидан уни такомиллаштириш бўйича тавсиялар бериш.
• IT-соҳада бизнесни ривожлантириш бўйича «MUIC» резидентларига маслаҳатлар бериш.
• Ўзбекистонда дунё бозоридаги энг талаб юқори йўналишлар бўйича қисқа муддатли IT-курслар очишни мўлжаллашяпти.

«Viber» компанияси вакиллари, шунингдек, мамлакатимиз ахборот технологиялари бозорига тўғридан-тўғри сармоя киритишни режалаштиряпти.