vivo иккита флагман смартфонни тақдим этди

vivo иккита флагман смартфонни тақдим этди

Ва ниҳоят анчадан бери миш-мишларда номи тушмаётган vivo X80 серияси тақдим этилди. Қизиқ томони шундаки, компания сериядаги энг асосий смартфон бўлган X80 Pro+ моделини тақдим этмади. Маълумотларга кўра, у шу йилнинг учинчи чорагида тақдим этилади. Ҳозирча фақат X80 ва X80 Pro моделлари тақдим этилди. 

vivo X80 Pro 

Худди Oppo каби vivo ҳам X80 Pro моделининг Snapdragon 8 Gen1 ва Dimensity 9000 чипи билан жиҳозланган версийларини тақдим этди. Кечаги тадбирда эълон қилинган смартфонлар фақат Хитой бозори учун ишлаб чиқилади. Халқаро бозорга қайси версиядаги қурилма сотувга чиқиши номаълум бўлса-да, катта эҳтимол билан бу Snapdragon чипли версия бўлади. 

Флагман чипидан ташқари смартфон флагман дисплейга ҳам эга, яъни унга QHD+ резолюциядаги Samsung компаниясининг E5 LTPO2 AMOLED дисплейи ўрнатилган. Ушбу дисплей адаптив янгиланиш частотага эга бўлиб, 1-120 гертс частота орасида ишлай олади. Компаниянинг таъкидлашича, дисплейнинг қувват самарадорлиги ўтган йилги Х70 Pro+ моделиникига нисбатан анча яхшиланган. 

X80 Pro экраности ультра товушли бармоқ изи сканери билан жиҳозланган бўлиб, унинг бармоқ изини ўқиш майдони 38.7% га катталашган. Шу кунгача фақатгина баъзи смартфон ишлаб чиқарувчи компаниялар ушбу турдаги бармоқ изи сканеридан фойдаланаётган эди. 

Камералар ҳақида маълумот берадиган бўлсак, орқа панелда тўртта камера сенсорлари жойлашган. Samsung компаниясининг 50МП 1/1.3 дюймли ISOCELL GNV сенсори қурилмага асосий камера сифатида ўрнатилган.

Сенсор f/1.57 диафрагма линзаси ва оптик тасвир барқарорлаштиргичига эга бўлиб, унга лазерли автофокус ва Пиксел шифт технологиялари ёрдам беради. 

Sony IMX663 сенсори эса 2х оптик зум камера вазифасини бажаради. У 1.2 микрон пиксел катталиги, f/1.85 диафрагма линзаси ва гимбал оптик тасвир барқарорлаштиргичига эга. Шунингдек, ушбу зум камера портрет суратларни ҳам олиши мумкин. 

8 мегапикселли 5х телефото камера ҳам оптик тасвир барқарорлаштиргичига эга. 48 мегапикселли Sony IMX598 сенсори эса ультракенг камера вазифасини бажаради. 

Барча камералар Zeiss компанияси билан ҳамкорликда ишлаб чиқарилган. Худди Х70 сериясидаги моделларга ўхшаб, X80 ва X80 Pro моделлари ҳам такомиллашган vivo V1+ ISP чипига эга бўлиб, у орқали тунда суратга олиш имкониятларини яхшилаш мумкин. 

Олд панелда эса f/2.5 диафрагмадаги 32 мегапикселли селфи камера жойлашган. Қурилма 80 ваттда қувват олувчи 4,700 мАс сиғимдаги аккумуляторга эга. У, шунингдек, 50 ваттда симсиз қувват олади. 

Snapdragon 8 Gen1 чипига эга бўлган версия 8/256ГБ, 12/256ГБ ва 12/512ГБ хотира турига эга бўлса, Dimensity 9000 чипдаги версия фақатгина 8/256ГБ ва 12/256ГБ хотира ҳажмига эга. Қурилманинг нархи қуйидагича: 

8/256ГБ - 840 доллар

12/256ГБ - 915 доллар

12/512ГБ - 1020 доллар 

vivo X80

Сериядаги энг арзон модель бўлишига қарамай, X80 ҳам Dimensity 9000 чипи билан жиҳозланган. Унинг Snapdragon 8 Gen1 чипли версияси мавжуд эмас. 

Қурилмага 6.78 дюймли Samsung E6 AMOLED дисплейи ўрнатилган. У LTPO2 технологиясига эга эмас. Дисплей 1500 нит ёрқинлик даражасига эга бўлиб, 120 гертс частотани қўллаб-қувватлайди. 

Камера техник жиҳатлари Pro моделникидек эмас. 1/1.49 дюймли 50МП Sony IMX866 сенсори асосий камера вазифасини бажаради. Ушбу сенсор f/1.75 диафрагма линзаси ва оптик тасвир барқарорлаштиргичига эга. 2х телефото камера эса X80 Pro моделидан ўтган, фақат унинг диафрагмаси бироз кичикроқ - f/1.98. 

5х телефото камера мавжуд эмас. 12МП Sony IMX663 сенсори ультракенг камера вазифасини бажаради. Селфи камеранинг резолюцияси эса 32 мегапикселни ташкил қилади. 

X80 модели 4,500 мАс сиғимли аккумулятор билан жиҳозланган бўлиб, у 80 ваттда қувват олади. Афсуски, ушбу модель симсиз қувватлаш технологиясини қўллаб-қувватламайди. 

Pro моделдан фарқли ўлароқ оддий модель IP68 стандартига эга эмас. Шунингдек, унга ультра товушли бармоқ изи сканери эмас, балки оптик бармоқ изи сканери ўрнатилган. Қурилма Android 12 операцион тизимига асосланган OriginOS Ocean гарфик қобиғида ишлайди. Аммо бу фақат Хитой бозори учун ишлаб чиқиладиган моделларга тегишли. Глобал версиялар эса катта эҳтимол билан FuntouchOS график қобиғига эга бўлади. 

Смартфоннинг 8/128ГБ, 8/256ГБ, 12/256ГБ ва 12/512ГБ хотирага эга бўлган турлари мавжуд бўлиб, унинг нархи қуйидагича: 

8/128ГБ - 565 доллар

8/256ГБ - 610 доллар

12/256ГБ - 670 доллар

12/512ГБ - 745 доллар

Иккала моделга ҳам ҳозирда буюртма бериш мумкин. Етказиб бериш эса 29 апрелдан бошланади. 

ЎҚИНГ: Илон Маск энди ўз ижтимоий тармоғига эга 

Сайтимизнинг энг чиройли расмларини Инстаграмдаги саҳифамизда томоша қилинг!