Vivo NEX Dual Display тақдим этилди: иккита AMOLED-экран, Snapdragon 845 чипи, 10 ГБ «оперативка» ва уч ўлчамли камера!
Кейинги пайтларда етакчи смартфонсозлар ҳам уддалай олмаган технологияларни ўз қурилмаларига татбиқ этаётган Vivo компаниясини яхши биласиз. Унинг «икки томонлама флагман» тайёрлаётгани ҳақида ҳам ёзганмиз.
Ваъдага кўра, кеча иккинчи авлод Vivo NEX смартфони расман намойиш қилинди. Унда ўз «аждод»идаги сингари корпус ичидан чиқувчи камера йўқ, аммо нақ иккита Super AMOLED дисплей бор!
Янги флагман расман Vivo NEX Dual Display Edition деб номланади – моделнинг асосий ўзига хослиги номида ҳам акс этган. Олд панелнинг 91,63 фоизини эгаллаган асосий экрани 6,39 дюймлик ўлчамда. Томонлари ўзаро 19,5:9 нисбатли бўлган бу дисплей 2340х1080 пикселлик тасвир аниқлигига эга. Корпуснинг орқасига эса 5,49 дюймлик иккинчи дисплей жойланган. Унинг томонлари ўзаро 16:9 нисбатда бўлиб, тасвир аниқлиги 1920х1080 пикселни ташкил этади.
Тақдимот маросимида Vivo компанияси иккинчи экранни қўллашнинг турли сценарийлари ҳақида гапирган. Улардан энг муҳими – селфи олаётганда дисплейда ўзини кўриб туриш бўлса, иккинчиси – ўйинларда иккинчи экрандан қўшимча бошқарув жиҳози сифатида фойдаланса бўлади!
Vivo NEX Dual Display Edition техник таъминоти асосини Qualcomm Snapdragon 845 ташкил этади. Бу смартфон фақатгина битта конфигурацияда ишлаб чиқарилади – 10 ГБ тезкор ва 128 ГБ доимий хотирага эга.
ЎҚИНГ: Vivo ҳам аллақачон 5G-смартфон тайёрлабди, уни ишлаётган ҳолатида «жонли» томоша қилинг!
Бу смартфонда олд камера йўқ – чунки селфи олиш учун иккинчи экранда ўзини кўриб туриш имкони бор. Орқа томонидаги камераси эса учта модулни ўз ичига олган бўлиб, уям янги технологияларга эга. Асосий объектив 12 мегапикселлик матрицали бўлиб, F/1,79 диафрагмалидир. Унга автофокус ҳамда оптик барқарорлаштириш тизими жорий қилинган. 2 мегапикселлик иккинчи объектив эса F/1,8 апертурали бўлиб, тасвирга олинаётган саҳнанинг чуқурлигини таҳлил қилишга масъул. Камера устида ёруғлик-диодли чироқчалардан ташкил топган ёй мавжуд: у суратга олишда фоточақноқ вазифасини бажаради, шунингдек турли билдиришномалар келганида тегишли рангларда ёниб хабар беради.
Камеранинг учинчи модули – энг қизиқарлиси: аслида унинг ўзи алоҳида 3D TOF камера десак ҳам адашмаймиз. Унинг асосий вазифаси фойдаланувчининг юзини уч ўлчамли тасвир сифатида таниш бўлиб, шу орқали ёрдамида смартфонни қулфдан чиқариш, шунингдек Face Pay технологияси воситасида тўловларни амалга ошириш мумкин. 3D TOF камера ҳақида мана бу мақоламиздан тўлиқроқ маълумот олишингиз мумкин:
ЎҚИНГ: Қарши олинг: iPhone X’даги Face ID’дан ўн карра аниқ технологияни Vivo яратди! (+видео)
Ишлаб чиқарувчининг таъкидлашича, 3D TOF ҳар қандай ҳар қандай об-ҳаво шароитларида ва ёритилганликдан қатъи назар ишлай олади. У орқали юзни танишга эса бор-йўғи 0,35 сония вақт кетади. Табиийки, камерага «сунъий онг» технологияси ҳам татбиқ этилган.
Бундан ташқари, смартфонни аллақачон анъанавий бўлиб қолган усул – бармоқ изи орқали ҳам қулфдан чиқарса бўлади. Тағин, дактилоскопик датчик олд экраннинг ўзига интеграция қилинган ва янада тезроқ – 0,29 сонияда эгасини «бармоғидан таниб» олади.
Vivo NEX Dual Display овоз имкониятлари ҳам катта: унга Asahi Kasei Microdevices томонидан тақдим этилган 32 битлик AK4377A аудиочипи ўрнатилган. Смартфоннинг 3500 мА/соатлик ток сиғимига эга аккумулятори тезкор қувватлаш технологиясига эга. Корпусининг ўлчамлари 157,19х75,3х8,09 миллиметрни, вазни эса 199,2 граммни ташкил этади.
Мазкур «икки томонлама смартфон» Vivo компаниясининг Funtouch OS 4.5 график қобиғи остидаги Android 9.0 Pie операцион тизими билан чиқарилган. Унинг нархи 725 АҚШ долларига тенг бўлиб, Хитойда олдиндан буюртмалар олиш 29 декабрдан бошланади.
Vivo NEX Dual Display бошқа мамлакатлар бозорига чиқиши ҳақида маълумот йўқ, аммо бизнинг Terashop.uz интернет-дўконимизда корпусининг орқасида ҳам қўшимча экрани бўлган икки хил смартфон мавжуд. Яъни, тезкор/доимий хотираси 4/64 гигабайтлик, қора корпусли Meizu Pro 7 смартфонини 2 099 000 сўм эвазига харид қилиш, 6/64 гигабайтлик Meizu Pro 7 Plus моделини эса 2 526 000 сўмга сотиб олиш мумкин.
ЎҚИНГ: Атиги 230 долларлик Vivo Z3 – компаниянинг илк ўйинбоп смартфони тақдим этилди
